Diamond yashimiye bikomeye Abanyarwanda kubera uko bakiriye mugenzi we
Umuhanzi Diamond Platnumz yashimiye bikomeye Abanyarwanda kubera uburyo bakiriye mugenzi we Harmonize mu gitaramo yahakoreye ku bufatanye na The Mane Music Label tariki ya 23 Werurwe 2018.
Rajab Abdul Kahali wamenyekanye nka Harmonize mu muziki ibikorwa bye bya muzika abikorera muri Wasafi Record ya Diamond, ni inshuti ya hafi ya Diamond ndetse baranakorana. Uyu yageze mu Rwanda ku wa 22 Werurwe 2018 aje mu bitaramo byabereye i Musanze ku wa 23 Werurwe n’i Kigali ku wa 24 Werurwe 2018, byose byari ibyo kumurika ku mugaragaro The Mane Music Label.
Ibi bitaramo bibiri byo kumurika inzu itunganya umuziki ya The Mane Music Label ikoreramo abahanzi babiri bo mu Rwanda Safi na Marina bose bakayoborwa na Bad Rama, byatangiriye i Musanze ku ya 23 Werurwe 2018 . Iki gitaramo cyabereye muri Stade Ubworoherane cyaritabiriwe ariko bitari ku rwego rwo hejuru nubwo abahanzi bashimishije abari bacyitabiriye.
Diamond yifashishije amafoto y’igitaramo Harmonize yakoreye i Musanze, yashimiye Abatuye i Musanze n’abanyatrwanda muri rusange kubw’urukundo bagaragarije mugenzi we bakorana bya hafi ,Harmonize .
Diamond cyangwa se Naseeb Abdul Juma, yafashe amafoto ya Harmonize ari mu gitaramo i Musanze maze ayashyira ku rukuta rwe rwa Instagram yandikaho ko abashimira kubera urukundo bagaragarije Harmonize.
Yagize ati:” Ndabashimiye cyane ku rukundo rukomeye mwagaragarije Harmonize, ndabashimira cyane ku ruhare mwagize mu kuza gushigikira umuziki wacu kugeza aha tugeze…Ubu uyu musore wacu yavuye Mtwara aza gukorera igitaramo mu Rwanda, gusa turacyafite urugendo rurerure kugira ngo tumenyekanishe umuziki wacu ku Isi yose , turabasabye muzakomeze kudusengera no kudufasha.”
Diamond ni umuhanzi ukunze kuza mu Rwanda mu bikorwa bitandukanye bya Muzika cyangwa se mu by’ubucuruzi dore ko anaherutse mu Rwanda ndetse akaba yaranasangiye ndetse aganira n’abahanzi batandukanye ba hano mu Rwanda, Ibi byabereye muri Marriott Hotel ku Cyumweru tariki ya 21 Mutarama 2018 aho bamwe mu bahanzi bo mu Rwanda bari bitabiriye ubu butumire bwa Diamond mu mugoroba wo gusangira no kuganira.
Bamwe mu bahanzi bakomeye ba hano mu Rwanda bitabiriye ibi biganiro harimo; Riderman, Safi Madiba,Dj Pius, Uncle Austin,Marina nabandi benshi bari bitabiriye ubutumire bwa Clouds Tv ishami ryo mu Rwanda bwo gusangira na Diamond icyamamare muri muzika yo mu karere na Afurika muri rusange.
