David de Gea yanenze imikinire ye na bagenzi be muri Manchester United
Umunyezamu David de Gea wa Manchester United avuga ko imikinire y’iyi kipe muri uyu mwaka w’imikino idakwiye kandi ko iki ari cyo gihe kimukomereye cyane kurusha ibindi byabayeho mbere kuva yayigeramo.
Ku munsi w’ejo ku cyumweru, Manchester United yatsinzwe igitego 1 – 0 na Newcastle United, ikomeza ugutangira nabi shampiyona kwa mbere kubi igize mu myaka 30 ishize.
De Gea, Umunya-Espanye w’imyaka 28, aganira na televiziyo ya Sky Sports yagize ati: “Umukino [wacu] si uwo kwihanganirwa”.
“Uyu mwaka w’imikino wose si uwo kwihanganirwa kuri twe”.
“Ntabwo twigeze turema amahirwe n’amwe agaragara yo gutsinda ibitego. Dufite byinshi byo kuvugurura. Ntabwo nzi icyo navuga”.
“Dufite abavunitse, ariko ibyo si urwitwazo. Turi Manchester United. Ducyeneye gukora imyitozo cyane tugakomeza guhatana tukongera tugasubira mu bihe byo gutsinda imikino”.
De Gea avuga ko kuva yagera muri Manchester United avuye muri Atletico Madrid mu 2011, iki ari cyo gihe kimukomereye cyane kurusha ibindi.
Amanota icyenda Manchester United ifite kugeza ubu mu mikino umunani ya shampiyona, ni yo macye cyane ifite mu mikino umunani ibanza ya shampiyona guhera mu mwaka w’imikino wa 1989 – 1990, Ubu iri ku mwanya wa 12 ku rutonde rw’agateganyo rwa shampiyona ya Premier League, ikaba ifite amanota abiri uvuye ku murongo utukura aho amakipe aba ashobora kumanuka mu cyiciro cyo hasi.
