CP Theos Badege wari umuvugizi wa Polisi y’igihugu yasimbujwe
Ku munsi w’ejo Commissioner of Police Jean Bosco Kabera yagizwe umuyobozi wa Polisi ushinzwe amakuru n’itumanaho muri Polisi y’igihugu asimbuye CP Theos Badege wari umaze imyaka 2 akora izi nshingano.
Nk’uko itangazo rigaragara kuri Twitter ya Polisi y’igihugu ribivuga, CP Kabera azafatanya izi nshingano no kuba umuvugizi wa Polisi y’igihugu.
Kabera wagizwe umuvugizi mushya wa Polisi y’igihugu yari asanzwe ari umuyobozi w’ishami rishinzwe ibikoresho muri Polisi y’igihugu. Yanabaye kandi umuyobozi w’ishuri ry’imyitozo rya Polisi y’igihugu riherereye i Gishari.
Izi mpinduka mu buyobozi bukuru bwa Polisi y’igihugu ije ikurikira iyabaye mu minsi mike ishize, ubwo DCG Dan Munyuza yagirwaga umuyobozi mukuru wa Polisi asimbuye IGP Emmanuel Gasana wagizwe Guverineri w’intara y’amajyepfo.
