Covid-19-Rwanda: Umubare w’abanduye wiyongeyeho 22 mu gihe nta muntu mushya wakize
Kur uyu wa Gatanu tariki 24 Mata 2020, umubare w’abanduye coronavirus wiyongeye bikabije, bitandukanye n’indi minsi yose.
bMinisiteri y’Ubuzima yatangaje ko mu bipimo 1046 yafashe uyu munsi, habonetsemo abantu 22 bashya basanganywe Coronavirus, bituma umubare w’abayanduye mu Rwanda ugera ku 176, mu gihe abamaze gukira ari 87.
Itangazo rya Minisante ryo ku mugoroba wo kuri uyu wa Gatanu, tariki ya 24 Mata 2020, rigaragaza ko mu ‘bipimo 1046 byafashwe uyu munsi, habonetse abarwayi bashya 22, nta mushya wakize ndetse nta n’uwari wapfa.’
Rikomeza rivuga ko ‘ibi bigaragaza ubwiyongere bw’imibare y’abanduye mu batwara amakamyo yambukiranya imipaka n’abo bakorana.’
Kuva umurwayi wa mbere agaragaye mu Rwanda ku wa 14 Werurwe 2020, hamaze kuboneka abantu 176 banduye icyorezo cya COVID-19 giterwa n’agakoko ka Coronavirus, abakize ni 87 mu gihe abakiri kwitabwaho kwa muganga bagera kuri 89. Minisante ivuga ko abarwayi bose bavurirwa ahantu habugenewe kandi boroherwa.
Ni ubwa mbere mu Rwanda hagaragaye abantu benshi banduye ku munsi umwe kuva Coronavirus yatahurwa ku Muhinde ukorera rimwe mu mashami ya Loni mu Rwanda. Umubare munini waherukaga gutangazwa wari uw’abarwayi 17 bagaragaye ku wa 23 Werurwe 2020, bari biganjemo abaherukaga mu ngendo hanze y’igihugu.
Minisante yakomeje gusaba abafite amakuru kuyatanga kugira ngo abakekwaho Coronavirus bakurikiranwe n’inzego zibishinzwe.
Yagize iti ‘‘Umuntu wese wanga gutanga amakuru arebana n’abahuye n’umurwayi wa Coronavirus cyangwa agahisha ibimenyetso byayo aba ashyize ubuzima bwa benshi mu kaga kandi abihanirwa n’amategeko.’’
Icyorezo cya COVID-19, gituruka ku gakoko ka Coronavirus cyatangiriye mu Mujyi wa Wuhan mu Bushinwa mu Ukuboza 2019; kuri ubu 2 813 618 bamaze kucyandura ku Isi yose, barimo 196 390 cyahitanye na 778 475 bagikize.
Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kuguma mu rugo, kwambara udupfukamunwa mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.
Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.
Umuntu wese ashobora kwipimisha akoresheje telefoni akanda *114# agakurikiza amabwiriza. Ugaragaza ibimenyetso bya Coronavirus asabwa guhamagara telefoni itishyurwa ya 114, cyangwa akohereza ubutumwa bwa WhatsApp kuri +250788202080 cyangwa akitabaza umujyanama w’ubuzima umwegereye.
