COVID-19: Polisi yafashe umusore atwaye umukobwa bakundana nk’umuzigo
Polisi yo mu gihugu cya Afurika y’Epfo mu ntara ya Guateng yataye muri yombi umusore wari utwaye mu buryo butemewe umukobwa bakundana, yamushyize mu ibutu y’imodoka ahagenewe imizigo, kugirango abashe kubona uko amugeza iwe muri iki gihe igihugu cyabujije abaturage kuva mu rugo hirindwa icyorezo cya Coronavirus.
Faith Mazibuko uri mu bayobozi b’intara ya Gauteng yatangaje ku rubuga rwa Twitter ko kuwa Gatanu w’icyumweru gishize ari bwo Polisi yataye muri yombi uwo musore mu bikorwa byo kugenzura abagenda muri iki gihugu kandi harahagaritswe ingendo zitandukanye, hagasigara abakora serivisi z’ingenzi kurusha izindi.
Nk’uko BBC dukesha iyi nkuru ibitangaza, uwo musore wari utwaye imodoka nta ruhushya yari abifitiye, akaba yajyaga mu ntara iri mu Burasirazuba yitwa Mpumalanga. Uyu musore yahise atabwa muri yombi ashinjwa gutwara umuntu mu buryo bwa magendu naho umukobwa afungwa azira ko gutwarwa magendu yari yabyemeye.
Yaba umusore ndetse n’umukunzi we, amazina yabo n’indi myirondoro ntibyatangajwe.
Igihugu cya Afurika y’Epfo cyatangiye gahunda yo kugumisha abaturage mu rugo tariki 24 Werurwe 2020, hashyirwaho ibyumweru bitatu ariko byaje kongerwa kugeza mu mpera z’uku kwezi kwa Mata. Serivisi zose zarahagaritswe hasigara nkeya za ngombwa kurusha izindi. Abanduye Coronavirus barenga 3000 muri iki gihugu, naho abarenga 50 bamaze gupfa bishwe n’iki cyorezo.
