COVID-19: Amerika ikomeje kugana ahabi abarenga 2800 bapfuye mu munsi umwe
Leta Zunze Ubumwe za Amerika ikomeje guca agahigo kabi mu kugira umubare munini w’abishwe na covid-19.
Ni nyuma y’aho kuri uyu wa Gatatu tariki 22 Mata 2020, abantu bagera 2 804 bapfuye bazize iki cyorezo.
Ubu imibare iri kwerekana ko muri iki gihugu abapfuye biyongereyeho abarenga 800, mbere gato tariki 20 Mata uyu mwaka, abari bishwe n’iyi ndwara bageraga kuri 1939.
Kugeza ubu imibare y’abishwe na covid-19 iriyongera kumuvuduko wo hejuru kuko muri Amerika ubu abantu 45 318 bahitanwe n’iki cyorezo mu gihe abanduye bamaze kugera ku 818 744.
Hashize iminsi Abanyamerika benshi hirya no hino muri iki gihugu bagaragaza ko barambiwe ibi bihe bidasanzwe byo kuguma murugo,berekana ko bifuza gusubira mumirimo yabo.
Ibi bakaba babihuriyeho na Perezida Donald Trump.
Muri iki gihugu Leta ya New York niyo ikomeje kuba ku isonga mu kugira umubare munini abanduye n’abamaze gupfa benshi bazize iki cyorezo.
Ubu iyi Leta yonyine ifite abamaze kwandura 256 555 naho 19,693 bakaba bamaze gupfa.
Kugeza ubu ku isi abamaze kwandura nabo biyongera umunsi kuwundi kuko abanduye bageze kuri 2 557 994 abamaze gupfa ni 177 688 mu gihe abamaze gukira bagera kuri 695 355.
Leta Zunze Ubumwe za Amerika iracyayoboye ibihugu bifite abapfuye n’abanduye benshi Ku isi bazize corona virus, igakurikirwa na Espagne ku mwanya wa kabiri nayo ifite abanduye 204 178 bamaze naho 21 282 bamaze gupfa, u Butaliyani bufite abanduye 183 957 mu gihe 24 648 bamaze gupfa bukaza kumwanya wa gatatu.
Ibindi bihugu by’ibihangange nk’ u Bufaransa bufite158 050 bamaze kwandura, 20 796 bamaze kwicwa n’iyi ndwara. Mu Budage abanduye ni 148 453, naho 5 086 bamaze gupfa.
Mu Bwongereza abanduye bageze kuri 129 044 abishwe n’iki cyorezo ni 17 337.
Muri Afuria Misiri iri imbere mu kugira abanduye benshi kuko ubu habarwa 3 490 abanduye, 264 bahitanwe n’iki cyorezo. Afurika y’Epfo iyigwa muntege mukugira abaduye benshi kuko ubu abanduye muri iki gihugu ari 3 465 muri bo 58 bamaze gupfa.
Ariko nanone muri Afurika yose muri Algeria niho hamaze gupfa abantu benshi kuko bagera kuri 392 mu gihe 2812 bamaze kwandura.
Mukarere u Rwanda ruherereyemo by’umwihariko Afurika y’Iburasirazuba, Kenya ikomeje kuza imbere mu kugira abamaze kwandura benshi kuko ubu bageze kuri 296 abapfuye ni 14 , mu Rwanda hamaze kuboneka abantu banduye 150 muri no 84 bamaze gukira, Uganda abanduye ni 61, muri Tanzania hamaze kuboneka abantu 254 hapfuyemo 10, mu Burundi abanduye ari 11,umwe niwe umaze gupfa ,Sudani y’Epfo kugeza ubu handuye bane.
Umugabane wa Afurika wose kugeza ubu, abantu 25 411 ubu bamaze kwandura covid-19, muri bo abagera kuri 1 197 bamaze guhitanwa n’iki cyorezo.
