Christiano Ronaldo ashobora kuba agiye kuva muri Real Madrid

Nyuma y’umukino wa wa UEFA Champions league Real Madrid yatsinzemo Liverpool 3-1, Christiano Ronaldo yavuze amagambo yatumye abenshi batekereza ko ashobora kuba agiye kuva mu kipe ya Real Madrid.

Igitego cya Kharim Benzema na bibiri bya Gareth Bale ni byo byaraye bifashije Real Madrid kwegukana igikombe cya 13 cya UEFA Champions league, cyabaye icya gatatu iyi kipe y’ubwami bwa Madrid yegukanye yikurikiranya.

Iki gikombe kandi cyabaye icya kane kuri Christiano Ronaldo wageze muri iyi kipe mu mwaka wa 2009 akubutse muri Manchester United yo mu gihugu cy’Ubwongereza.

Nyuma y’uyu mukino, Ronaldo watsinze ibitego 17 muri UEFA Champions league yavuze amagambo yatumye abenshi bemeza ko ashobora kuva ml Madrid.

Aganira n’itangazamakuru Ronaldo yagize ati”Byari byiza cyane kuba muri Real Madrid. Ubungubu ngiye kwishimira igikombe kimwe n’abandi, hanyuma mu minsi mike iri imbere ni bwo nzasubiza abafana bahereye kera banshyigikira. Dukoze amateka, ni ikintu cy’ingenzi cyane.” Ronaldo aganira na BeIN Sports.

Yongeyeho ati”Ahazaza h’umukinnyi si ingenzi.”

Ronaldo yakoze amateka yo kuba umukinnyi utsinze ibitego byinshi mu myaka itandatu mu mateka ya UEFA Champions league, Real Madrid yo iba ikipe ya mbere ishoboye gutwara UEFA Champions league eshatu zikurikiranya, nyuma y’imyaka 42 yari ishize.