CECAFA: Jacques Tuyisenge na Mustafa Francis bafashije Gor Mahia kugera muri 1/2
Ikipe ya Gor Mahia yakatishije tike ya 1/2 cy’irangiza mu mikino ya CECAFA Kagame Cup ikomeje kubera i Dar Es Salaam muri Tanzania, nyuma yo gutsinda Vipers yo muri Uganda ibitego 2-1, mu mukino wa 1/4 cy’irangiza.
Ibitego by’umunyarwanda Jacques Tuyisenge n’Umurundi Francis Mustafa ni byo byafashije iyi kipe y’umutoza Kerr Dylan kugera muri 1/2 cy’irangiza.
Ni umukino wabereye kuri Stade y’igihugu ya Tanzania iherereye mu mujyi wa Dar Es Salaam.
Ni umukino watangiye amakipe yombi asatirana, gusa Vipers iza kuwuyobora nyuma y’igitego cyo ku munota wa 15 w’umukino cyatsinzwe na Tadeo Lwanga.
Iki gitego cyashyize abakinnyi ba Gor Mahia ku gitutu, bakinisha imbaraga bashaka kukishyura, gusa Vipers ikageregeza kurinda izamu ryayo bityo bajya kuruhuka ari 1 cya Vipers ku busa bwa Gor Mahia.
Igice cya kabiri kigitangira Gor Mahia yahise yishyura iki gitego ibifashijwemo na Jacques Tuyisenge ku munota wa 47 w’umukino, mbere y’uko Umurundi Francis Mustafa iyi kipe iheruka kuvana muri Kiyovu Sports arangiza akazi ku munota wa 74 w’umukino.
Undi mukino uteganyijwe kuba uyu munsi ni uhuza Simba Sports Club na AS Ports yo muri Djibout, akaba ari umukino uteganyijwe gutangira mu kanya saa kumi n’ebyiri za hano i Kigali.
