CAS yatesheje agaciro icyemezo cya CAF iha Esperance de Tunis igikombe cya Champions league

Ikipe ya Esperance Sportive de Tunis yo muri Tunisia, yemejwe n’urukiko rwa siporo (CAS) ko igomba gushyikirizwa igikombe cya CAF Champions league 2018/2019, nyuma y’umukino wa nyuma wayihuje na Wydad Casablanca yo muri Maroc bikarangira utarangiye kubera imvururu.

Mu ijoro ryo ku wa 30 Gicurasi ni bwo Esperance de Tunis na Wydad Casablanca zari zahuriye mu mukino wa kabiri wo kwishyura wa CAF Champions league, nyuma y’ubanza yari wabereye muri Maroc bikarangira amakipe yombi anganya igitego 1-1.

Uyu mukino wo kwishyura wari wabereye i Rades muri Tunisia ntabwo wigeze urangira kubera ko abakinnyi ba Wydad Casablanca bigumuye bikarangira bavuye mu kibuga. Intandaro yabaye iy’uko Umunya-Gambia Bakary Papa Gassama yari amaze kwanga igitego bari bamaze gutsinda.

Ni igitego cyari gitsinzwe na Walid El Karti ku munota wa 58 w’umukino.

Nyuma Esperance de Tunis yahise yemezwa ko itwaye igikombe, gusa nyuma y’iminsi ine CAF itegeka iyi kipe yo muri Tunisia kugarura igikombe yari yahawe. Iki cyemezo cyafashwe ku wa 05 Kamena, mu nama y’igitaraganya yahurije abayobozi ba CAF i Paris mu Bufaransa.

Iyi nama yari yanzuye ko umukino wa nyuma wa CAF Champions league wari wahuje Esperance de Tunis na Wyadad Casablanca usubirwamo, nyuma yo gusanga harabayeho amanyanga yanatumye VAR idakora.

Kuri uyu wa kabiri ni bwo CAS yanzuye ko Esperance de Tunis ishyirikizwa igikombe cyayo, nyuma y’ubujurire iyi kipe yo muri Tunisia yatanze muri uru rukiko rukorera mu Busuwisi.

Ikipe ya Esperance de Tunis yemeje aya makuru ibinyujije ku rubuga rwayo rwa Twitter.

https://twitter.com/EsperanceSTunis/status/1156533694817087489

TAS nta tangazo risobanura impamvu yafashe icyemezo cyo guha Esperance igikombe irashyira ahagaragara.