CAF Confederation Cup: Rayon Sports iracakirana na USM Alger ibura 4 b’inkingi za mwamba

Kuri uyu wa gatatu, ikipe ya Rayon Sports ihagarariye u Rwanda mu mikino ya Total CAF Confedrations Cup iracakirana na USM Alger yo muri Algeria yaraye imaze iminota hafi 30 ikorera imyitozo mu mwijima.

Ni umukino wa gatatu ubanza w’itsinda uza kubera kuri Stade ya Kigali.

Ikipe ya Rayon Sports irasabwa gutsinda uyu mukino mu rwego rwo kwigarurira ikizere cyo kuyobora iri tsinda n’amanota 5, mu gihe ikipe ya Gor Mahia yaba itsikiye kuri Young Africans mu wundi mukino w’iri tsinda ugomba kubera muri Kenya.

Ikipe ya Rayon Sports iraza gukina uyu mukino ifite benshi mu nkingi za mwamba zayo, ziyongeraho myugariro Rwatubyaye Abdoul wamaze kubona ibyangombwa bimwemerera gukina imikino nyafurika y’uyu mwaka.

Ku rundi ruhande, USM Alger iraza gukina uyu mukino idafite 4 mu nkingi za mwamba zayo, ziromo myugariro Mettah Rabai, Yaya Fouzi ukina hagati mu kibuga ndetse n’abazamu 2 barimo Ismail Mansouri na Mourad Berrefane.

Roberto Oliveira Goncalves de Calmo utoza Rayon Sports, avuga ko bagomba gutsinda USM Alger ku kabi n’akeza gusa ngo umurindi w’aba Rayons urakenewe.

Aganira na Times Sport yagize ati” Umukino wa USM Alger tuwuhanze amaso cyane, kuko ari wo ugomba kugena ahazaza hacu muri iri tsinda. Ndasaba abafana kuza kudushyigikira ari benshi kuko umurindi wabo uzatugirira akamaro kanini.”

“Gutsinda USM Alger ni iby’ingenzi mu tsinda kuko byaduha kuriyobora bitewe n’ibyavuye mu mukino wa Gor Mahia na Young. Turawufata nk’umukino tugomba gutsinda ku kabi n’akeza.”

USM Alger ni yo iyoboye iri tsinda n’amanota 4, Rayon Sports na Gor Mahia ziyikurikira zifite 2 na ho Young Africans iri ku mwanya wa nyuma ifite inota rimwe.

Mu gihe USM Alger yaba itsinze Rayon Sports, yahita ibona tike ya 1/4 cy’irangiza, igasiga amakipe yo mu karere agundaguranira kwishakamo izayikurikira mu gusohoka mu itsinda.