CAF Champions league: Rayon Sports iguye miswi na Mamelodi Sundowns
Umukino ubanza wa 1/16 muri CAF Champions league wahuzaga Rayon Sports na Mamelodi Sundowns uragiye amakipe yombi aguye miswi 0-0.
Ni umukino abenshi bari bateze ko ikipe ya Rayon Sports igomba gutakaza, bagendeye ku bigwi ikipe ya Mamelodi Sundowns ifite. Ikipe ya Mamelodi ifite igikombe cya CAF Champions league cyo mu wa 2016, ikaba kandi ibarizwa mu makipe afite agatubutse ku mugabane wa Afurika.
Ikipe ya Rayon Sports kandi yakinnye uyu mukino ibura bamwe mu bakinnyi b’inkingi za mwamba barangazwe imbere na Manzi Thierry wari utemerewe gukina uyu mukino kubera amakarita y’umuhondo, na Djabel Manishimwe ufite ikibazo cy’imvune.
Umukino watangiye Mamelodi Sundowns ihererekanya neza mu kibuga kurusha Rayon Sports, gusa nta buryo bufatika yigeze ibona imbere y’izamu rya Bakame, dore ko ubwugarizi bwa Rayon Sports bwarimo Faustin Usengimana, Ange Mutsinzi na Mugabo Gabriel bwari buhagaze neza.
Rayon Sports yabonye uburyo bukomeye ku munota wa 43 w’umukino, ku mupira wari utanzwe na Ismailla Diarra gusa Shabani Hussein aserebetse umupira aza kuwuhusha.
Igice cya mbere kandi cyagoye Nahimana Shassir, waje no kuvanwa mu kibuga ku munota wa 35 asimbuwe na Nyandwi Sadam, nyuma yo kugaragaza imbaraga nke mu kibuga.
Igice cya mbere cy’umukino cyarangiye nta kipe ishoboye kureba mu izamu ry’indi.
Mu gice cya kabiri, Rayon Sports yatinyutse, itangira gukina neza binyuze kuri Kwizera Pierrot na Shabani Hussein bacishagamo bakataka izamu rya Masandawana, gusa umuzamu Denis Onyango na ba myugariro bari bayobowe na Nascimento.
Rayon Sports yabonye uburyo bukomeye mu gice cya kabiri cy’umukino binyuze ku mupira Chris Mbondi yateye ku munota wa 72 bikarangira ugaruwe n’igiti cy’izamu.
Rayon Sports yabonye ubundi buryo nyuma y’ikosa ryari rikozwe n’umuzamu Denis Onyango wafatiye umupira hanze y’urubuga rwe, gusa Kwizera Pierrot ahannye iri kosa umupira ujya hanze y’izamu.
Iminota 90 y’umukino yarangiye amakipe yombi anganyije 0-0.
Umukino wo kwishyura hagati ya Rayon Sports na Mamelodi Sundowns iteganyijwe mu minsi icumi itaha, ukazabera i Juhanesburg muri Afurika y’epfo.
