Bwa mbere urukingo rwa COVID19 rwageze ku kirwa cya Iwawa (+Amafoto)

Ikirwa cya Iwawa kiri mu kiyaga cya Kivu mu karere ka Rustiro gicumbikiye abantu 1621 barimo kugororwa no kwigishwa imyuga. Kuba baba hamwe bishobora gukurura ibyago hagize uwandura Covid-19.

Bwa mbere urukingo rwa Covd19 rwageze kuri iki kirwa ruvuye ku bitarao bya Gisenyi , Abagororwa 300 bagororerwa ku kirwa cya Iwawa bahawe urukingo rwa mbere rwa Covid-19.

Ni inkingo zahawe 20% z’abagororerwa kuri iki kirwa bangana na 300 mu bantu 1621 bari kuhagororerwa.

Dr. Nshimiyimana Jean Damascène uyobora ikigo ngororamuco cya Iwawa yatangaje ko abakingiwe ari abarengeje imyaka 40 kimwe n’abafite uburwayi budakira nka hepatite, umuvuduko w’amaraso n’izindi ndwara zidakira zatuma bazahazwa na Covid-19 baramutse bayirwaye.

Uwayezu Jean Claude ugororerwa ku kirwa cya Iwawa avuga ko bari bamaze iminsi bibaza igihe bo bazakingi rwa dore ko bajyaga  babona kuri televisiyo Abanyarwanda bakingirwa ubu bakaba bashima kuba iyi gahunda yabagezeho.

Dr. Nshimiyimana avuga ko ibikorwa byo gukingira bizakomeza hakurikijwe uko inkingo zizagenda ziboneka, bakaba bakomeje kwirinda ko Covid-19 yagera mu bagororerwa kuri iki kirwa.

Uyu muyobozi yanavuze  ibikorwa byo gusura abagororwa Iwawa bishobora kuzasubukurwa mu gihe inkingo zaboneka bagakingira benshi hejuru ya 60%.