Bwa mbere mu mateka ya Congo habaye guhererekanya ubutegetsi mu mahoro
Félix Antoine Tshilombo Tshisekedi uherutse gutorerwa kuyobora Repubulika ya Demokarasi ya Congo amaze ku kurahira kuyobora iki gihugu ku gicamusi cyo kuri uyu wa Kane taliki ya 24 Mutarama 2019 asimbuye Joseph Kabila.
Félix Tshisekedi w’imyaka 55 abaye Perezida wa gatanu wa Congo Kinshasa kuva yabona ubwingege mu 1960 nyuma ya Joseph Kasavubu, (Joseph-Désiré) Mobutu Sese Seko, Laurent Desiré Kabila na Joseph Kabila Kabange, ninabwo bwa mbere muri iki gihugu habaye iherekanya ry’ubutegetsi mu mahoro.
Perezida Joseph Kabika usimbuwe na Tshisekedi we yayoboye iki gihugu kuva muri Mutarama 2001 asimbuye se Laurent Desiré Kabila wari umaze kwicwa.
Félix Tshisekedi umuyobozi w’ishyaka UDPS ryari irya se Etienne Tshisekedi yatowe ahigitse bagenzi be barimo Martin Fayulu na Emmanuery Shadary
Umukandida wari uhanganye na Tshisekedi , Emmanuery Shadary yaje aho uyu muhangowo kurahira wabereye naho Fayulu akaba atahageze kuko avuga ko ari we Perezida watowe n’abaturage.
Uyu muhango wabereye kuri ‘Palais de la nation’ i Kinshasa, witabirwa n’abahagarariye ibihugu byabo n’imiryango mpuzamahanga, witabirwa kandi na Perezida umwe w’ikindi gihugu, Uhuru Kenyatta, mu batumiwe.
Félix Tshisekedi mu ijambo yagejeje ku bitabiriye uyu muhango yishimiye ko igihugu cye bwa mbere kuva cyagira ubwigenge habayeho ihererekanya bubasha mu nzira ya demokarasi kandi mu mahoro. Yavuze ko agiye gukomeza kubaka Congo izira amacakubiri yose na Leta igamije iterambere rya bose ndetse ko bagiye kubaka igihugu kigendera ku mategeko kandi kigamije guha serivisi abaturage bacyo bose.
Uyu mukuru w’igihugu mushya yanashimiye Perezida Joseph Kabila Kabange ko ari we utumye igihugu kigira ihererekanya ry’ubutegetsi muri demokarasi n’amahoro.
Perezida ucyuye igihe muri Repubulika Iharanira Demokarasi ya Congo, Joseph Kabila, waje muri uyu muhango yogoshe ubwanwa yari yarateretse, mbere yuyu muhango yatangaje ko nta kwicuza afite guturutse ku kuba agiye gusimburwa ku butegetsi na Félix Tshisekedi.
Félix Tshisekedi yatorewe kuba Perezida n’amajwi 7 051 013 angana na 38,57% by’amajwi amaze kubarurwa. Martin Fayulu yaje ku mwanya wa kabiri na 6 366 732 bingana na 34,83%, imbere ya Emmanuel Ramazani Shadary watowe n’abaturage 4 357 359 bingana na 23,84%.
