Bwa mbere Afurika y’Epfo yamaze gukora urukingo rwa Covid-19
Mu gihe ibihugu bitandukanye bikomeje gukataza mu kwiyubaka mu bijyanye n’iterambere ry’ubuvuzi , muri Afurika umugabane usa nawe wirengagizwa mu bijyanye n’ubuvuzi kuri ubu uruganda rukora imiti rwo muri Afurika y’Epfo, Afrigen Biologics ku wa Kane tariki 3 Gashyantare 2022, rwatangaje ko rwakoze urukingo rwa mbere rwa Covid-19 rwo mu bwoko bwa mRNA.
Mu ikorwa ry’uru rukingo hifashishijwe amwe mu makuru y’urukingo rwa Moderna. Ibi bibaye nyuma y’umwaka umwe hatangiye gutangwa urukingo rwa mbere rwa Covid-19 ndetse na nyuma y’imyaka ibiri iki cyorezo giteye, kugeza ubu abanyafurika bangana na 11.3% ni bo gusa bamaze gukingirwa.
Uru rukingo nubwo rwamaze gukorwa ntabwo ruratangira kugeragezwa nk’uko Umuyobozi mukuru wa Afrigen, Petro Terblanche, yabitangaje ibi bikazakorwa ku bantu mu kwezi k’Ugushyingo 2022, mu gihe mu kwezi gutaha bazatangira kurugeragereza ku nyamanswa.
Iyi nkuru igitangazwa bamwe batangiye kuvuga ko aba bakoze uru rukingo baba bariganye uko urukingo rwa Moderna rukozwe Gusa abayobozi b’uru ruganda bahakanye ayo makuru.
Petro Terblanche yagize ati “Ntabwo twiganye Moderna, twateje imbere inzira zacu kuko Moderna nta koranabuhanga na rimwe yaduhaye”.
Yakomeje batangira gukora uru rukingo batangiranye na Moderna, bitewe n’uko babonaga, yabafasha kugera ku bikoresho byibanze. “Si urukingo rwa Moderna, ni urukingo rwa Afrigen mRNA”.
