Buri cyumweru impunzi 2,000 z’Abarundi zizajya zivanwa muri Tanzania zisubizwe iwabo
Leta ya Tanzania n’iy’u Burundi, basinyanye amasezerano y’uko buri cyumweru impunzi 2,000 z’Abarundi zizajya zivanwa muri Tanzania zigasubizwa iwabo.
Aya masezerano yo gucyura ziriya mpunzi, hagati y’ibihugu byombi yasinywe na Minisitiri w’umutekano w’imbere muri Tanzania Kangi Lugola, n’uw’umutekano w’imbere mu Burundi Barandangiye Pascal.
Minisitiri Lugola aganira n’itangazamakuru ryo muri Tanzania, yavuze ko impunzi z’Abarundi zizatangira gusubizwa iwabo guhera mu Ukwakira uyu mwaka, kandi zikaba zizakirwa neza na leta y’u Burundi.
Ati” Dufite amakuru ko hari abantu n’imiryango mpuzamahanga itera ubwoba impunzi ivuga ko mu Burundi nta mahoro ari yo, ibintu bitari ukuri. Igihugu kiri mu mahoro akaba ari yo mpamvu impunzi zigomba gusubira iwabo.”
Minisitiri Lugola yanaburiye abakomeje gusaba impunzi z’Abarundi kudataha iwabo ko bazatabwa muri yombi, ngo kuko leta ya Magufuli idakinishwa n’uwo ari we wese.
Uyu muminisitiri yongeyeho ko iki kibazo cyo gucyura impunzi bagiye kugishyira mu bikorwa, ku bufatanye na leta ya Tanzania, u Burundi ndetse n’umuryango w’abibumbye wita ku mpunzi, HCR aho buri cyumweru hazajya hacyurwa impunzi ibihumbi bibiri.
Abarundi barenga ibihumbi 400 bahungiye mu bihugu umunani ubwo imvururu za politiki zishingiye kuri manda ya Perezida Pierre Nkurunziza, abenshi bamushinjaga ko inyuranye n’Itegeko Nshinga ndetse n’amasezerano ya Arusha, zatangiraga mu gihugu cyabo mu 2015.
IOM itangaza ko abagera ku bihumbi 280 bahungiye muri Tanzania, aho 80% ari abagore n’abana.
