Brig General J. Damascene Sekamana na Rurangirwa Louis ni bo bagomba gutorwamo umuyobozi wa FERWAFA
Brig. Gen Jean Damascene Sekamana, wari warasezerewe mu gisirikare cy’u Rwanda na Rurangirwa Louis wahoze ari umusifuzi, ni bo bakandida bagomba guhatanira kuyobora Ishyirahamwe ry’umupira w’amaguru mu Rwanda (FERWAFA) nyuma yo gusanga bombi bujuje ibisabwa ngo bererwe kwiyamamaza.
Nk’uko byemejwe na Komisiyo y’amatora ya FERWAFA mu kiganiro n’abanyamakuru kuri uyu wa 9 Werurwe 2018, Rtd Brig.Gen Sekamana w’ imyaka 60 y’amavuko wahawe ikiruhuko cy’izabukuru mu ntangiriro z’uyu mwaka wa 2018, akaba ari umukandida wa INTARE FC, ni we wenyine wemerewe kwiyamamariza kuyobora FERWAFA.
Rtd Brig.Gen Sekamana agiye kwiyamamariza umwanya wa Perezida wa FERWAFA mu matora agomba gusubirwamo ku itariki ya 31 Werurwe 2018, nyuma y’uko ayabaye mu mpera z’umwaka ushize yarangiye imfabusa ari zo ziyatsinze.
Rtd Brig.Gen Sekamana naramuka agize amajiwi ari hejuru ya 26 azaba atsinze amatora, ahite asimbura Nzamwita Vincent ‘De gaule’ watorewe kuyobora Ferwafa tariki ya 5 Mutarama 2014, akaba yari yahawe gukomeza kuyobora iyi nzu ubwo haburaga utsinda amatora.
Undi watanze kandidatire ye ni Rurangirwa Louis utari wujuje ibisabwa mu matora aheruka, bituma atemezwa mu bakandida ba nyuma bahatanye mu matora aheruka, ariko akanama gashinzwe amatora nyuma yo gusuzuma dosiye yo kwiyamamaza kwe basanze noneho yujuje ibisabwa bityo yemererwa kwiyamamaza.
Uyu wahoze ari umusifuzi, yageze ku cyicaro cya Ferwafa gutanga kandidatire ye, habura iminota itandatu ngo akanama gashinzwe gutegura amatora gafunge igikorwa cyo kwakira kandidatire.
Aba bakandida bombi bazatangira kwiyamamaza kuwa 12 Werurwe 2018 kugeza kuwa 30 Werurwe 2018 saa tanu n’iminota mirongo itanu n’icyenda (11:59pm), mu gihe amatora nyirizina yo uteganyijwe kuba kuwa 31 Werurwe guhera saa munani z’anywa (2:00pm)
