Bibayeho! Miroplast itewe mpaga na Rayon Sports
Uyu munsi tariki ya 27 Gicurasi shampiyona y’icyiciro cya mbere yari gukomereza kuri stade ya Kigali i Nyamirambo Rayon Sports yakira Miroplast none rayon Sports itahanye amanota atatu idakinnye.
Miroplast imaze iminsi ivugwamo amikoro make, aho abakinnyi bamaze amezi atanu badahembwa ntiyageze ku kibuga bituma iterwa mpaga. Iyi kipe yategerejwe ku kibuga irabura kuko itari yanavuze niba igera ku kibuga ikerewe cyangwa se ko idakina umukino , Rayon Sports yo yageze ku kibuga kare yiteguye gukina.
Ibijya gushya birabanza bigashyuha, byatangiye uwari umuganga wayo akaba n’umucungamutungo Sibonama Jean Claude atorokana amafaranga yari kuvamo imishahara y’abakinnyi bituma iyikipe idahemba abakinnyi bayo.
Iyi kipe yakomeje kugenda igira ibibazo bitandukanye aho byashobokaga cyane ko yasiba imikino yabanje ariko bagakomeza gusunikiriza mu bushobozi buke bagakina none uyu munsi byanze bahitamo kudakina.
