Benjamin Netanyahu yongeye gutsindira intebe ye muri Israel
Amajwi y’agateganyo yatangajwe nyuma y’amatora yo muri Israel yagaragaje ko Minisitiri w’Intebe, Benjamin Netanyahu, yahigitse mugenzi we, Benny Gantz, bahanganye muri aya matora agomba kugaragaza ishyaka rifite ubwiganze mu Nteko Ishinga Amategeko rikazahita rinashyiraho Guverinoma.
Aya majwi agaragaza ko ishyaka rya Netanyahu ryatsindiye imyanya 37 mu Nteko Ishinga Amategeko y’iki gihugu mu gihe irya Gantz ryatsindiye 34.
Kugeza ubu igiteranyo cy’amajwi ishyaka rya Netanyahu n’arishyigikiye amaze kuba 60 ku myanya 120 y’Inteko Ishinga Amategeko mu gihe irya Gantz n’arishyigikiye rigifite 54.
Amajwi yemeza uwatsinze aya matora abaye ku nshuro ya gatatu biteganyijwe ko aza gutangazwa kuri uyu wa kabiri. Ibyiciro bibiri by’amatora bibanziriza iki cyabaye kuri uyu wa mbere, Netanyahu na Gantz nta n’umwe wabashije kugira icya kabiri cy’imyanya 120 y’Inteko Ishinga Amategeko.
Aya matora kandi abaye mbere y’ibyumweru bibiri ngo Netanyahu yitabe urukiko ku byaha bya ruswa ashinjwa nubwo we abihakana yivuye inyuma.
Nyuma y’itangazwa ry’amajwi y’agategeko, Netanyahu yashyize kuri Twitter ifoto ye yishimira ibyavuyemo avuga ko ari ‘Intsinzi ikomeye kuri Israel’.
Nyuma yongeyeho amagambo agira ati “Twatsinze! Turashimira abarwanashyaka badushyigikiye muri uru rugendo, turashimira n’abaturage ba Israel.”
Itangazo Ishyaka rye Likud ryasohoye rivuga ko Netanyahu yavuganye n’abayoboye andi mashyaka amushyigikiye ndetse bemeranya gushyiraho guverinoma mu gihe gito nk’uko BBC yabitangaje.
Nubwo Gantz atemeje ko yatsinzwe aya matora, yavuze ko amajwi y’ibanze yatangajwe nta cyizere amugaragariza.
Netanyahu w’imyaka 70 ni umwe mu bayoboye Israel igihe kirekire, arimo gushaka manda ya gatanu nyuma y’uko afashe ubuyobozi hagati yo mu 1996-1999, akongera kubujyaho guhera mu 2009.
