AZAM Premier league: Rayon Sports na Kiyovu zibonye amanota atatu
Imikino isoza ibanza muri shampiyona y’icyiciro cya mbere hano mu Rwanda, Azam Rwanda Premier League isize Kiyovu Sports ikuye amanota 3 ku Magaju nyuma yo kuyatsindira ku mumena 2-0, mu gihe Rayon Sports yo yatsindiye FC Marines kuri Stade ya Kigali ibitego 2-0.
Kiyovu Sports yabashije kwegukana amanota atatu muri uyu mukino, nyuma y’ibitego bya Nizeyimana Djuma ku munota wa 42 w’umukino ndetse n’icya Uwineza Aime Placide cyabonetse ku munota wa kabiri w’inyongera.
Ni umukino wanabonetsemo ikarita itukura kuruhande rw’ikipe y’amagaju nyuma y’amakarita abiri y’umuhondo yeretswe Munezero Dieudonne.
Iyi nsinzi Kiyovu Sports yaboneye imbere y’abafana bayo yatumye yongera kwisubiza umwanya wa mbere muri iyi shampiyona n’amanota 28 aho ikurikiwe n’ikipe ya Rayon Sports iri ku mwanya wa Kabiri n’amanota 27.
Iyi Rayon Sports kandi nay o yari yaserutse kuri iki cyumweru yakira FC Marines kuri Stade ya Kigali. Muri uyu mukino wari wanitabiriwe na Perezida wa CAF Ahmad Ahmad uri mu ruzinduko rw’iminsi itatu mu Rwanda, Rayon Sports yatsinze Marines ibitego 2-0.
Ibitego bya Kevin Muhire na Kwizera Pierrot ni byo byafashije iyi kipe y’ubururu n’umweru gufata umwanya wa kabiri n’ubwo ikinafite umukino w’ikirarane muri iyi shampiyona.
Indi mikino y’umunsi wa 15 wa shampiyona yabaye:
Kirehe Fc yatsinze Police 1-0 Police, mu gihe Miroplast yatsinzwe na Sunrise ibitego 2-1.
Iyi shampiyona izakomeza ku munsi w’ejo hakinwa umukino AS Kigali igomba kwakiramo Musanze, mu gihe umukino wagombaga guhuza APR FC na Espoir wasubitswe, ukaba wagombaga kuba ku wa kabiri.
Urutonde rwa shampiyona:
1.Kiyovu n’amanota 28
2.Rayon Sports n’amanota 27
3.As Kigali na 26
4.Sunrise na 25, ni mugihe ikipe ya APR FC yo ihagaze ku mwanya wa 6 n’amanota 21, gusa iyi kipe y’ingabo z’igihugu imaze kugira imikino 3 y’ibirarane itari yakina.
