AS Kigali ikomeje kwibazwaho na benshi yamaze kwamburwa umuzamu na Kiyovu Sports
Ikipe ya Kiyovu Sports yamaze kwisubiza Bate Shamiru wahoze ari umunyezamu wayo mbere yo kuyisohokamo akerekeza muri AS Kigali.
Uyu muzamu ukomoka mu gihugu cya Uganda yamaze gusinyira iyi kipe yo ku Mumena amasezerano y’imyaka ibiri.
Ni nyuma y’iminsi ishize Kiyovu Sports ishakisha uwaza kunganira umuzamu Ndori Jean Claude uri kugenda atega zivamo cyo kimwe na Djihad Nzyurwanda ukiri muto.
Shamiru Bate abaye umukinnyi wa gatatu w’inkingi ya mwamba usohotse muri iyi kipe y’abanyamujyi, nyuma ya Iradukunda Eric bita Radu wagiye muri Rayon Sports, cyo kimwe na Evode Ntwari wagiye mu kipe ya APR FC.
Aba kandi biyongera ku bandi benshi muri iyi kipebasoje amasezerano yabo batarongererwa amasezerano. Ni mu gihe hari amakuru avuga ko ikipe ya AS Kigali ifite ibibazo by’amikoro, nyuma yo guhagarikirwa inkunga yahabwaga n’ubuyobozi bw’Umujyi wa Kigali.
