Areruya Joseph yahembwe nk’umukinnyi w’umwaka wa 2017 mu Rwanda

Areruya Joseph Kimasa, umunyarwanda ukina umukino wo gusiganwa ku magare ni we wahembwe na Rwanda Sports Awards nk’umusporif wahize abandi muri 2017, mu gihe Rayon Sports yahembwe nk’ikipe yigaragaje kurusha izindi mu mwaka ushize.

Ni igikorwa cyabereye kuri Ubumwe Grand Hotel ibarizwa i Kigali ku wa gatanu Tariki 30 Werurwe aho hahembwe abakinnyi, abatoza, abayobozi b’amashyirahamwe n’abandi bagize uruhare runini mu guteza imbere imikino mu mwaka wa 2016-2017.

Areruya Joseph Kimasa wegukanye ibihembo bitandukanye muri 2017 ni we watowe nk’umukinni wahize abandi mu mikino yose.

Ntawashidikanya ko uyu musore akwiye iki gihembo kuko yegukanye amarushanwa hafi ya yose yakinnye harimo Tour du Rwanda ya 2017, yatwaye agace kamwe muri Giro Italia U23 muri 2017, La Tropicale Amissa Bongo, Tour de l’espoir ndetse yanatwaye umudari wa zahabu muri shampiyona nyafurika mu mukino wo gusiganwa ku magare yabereye hano mu Rwanda.

Mu bandi bahembwe harimo Yannick Mukunzi wa Rayon Sports wahembwe nk’umukinnyi waranzwe n’ikinyabupfura, mu gihe Nyirarukundo Salome ukina umukino wo gusiganwa ku maguru yahembwe nk’uwahize abandi mu bari n’abategarugori.

Mu kiciro cy’abatoza hahembwe Sterling Magnell, Umutoza w’Ikipe y’Igihugu y’Amagare,  wabaye umutoza w’umwaka na ho Mukasa Nelson watangije anakundisha abantu siporo ngarukakwezi itari iy’umwuga ibera mu Mujyi wa Kigali (Car Free Day) atorerwa kuba umutoza mwiza.

Rayon Sports FC yatowe nk’ikipe y’umwaka na ho itsinda ry’abafana bayo, Gikundiro Forever riba iryahize ayandi.

 

Umujyi wa Kigali wahembwe nk’ikigo cya Mbere cyagize uruhare mu guteza siporo imbere, SORAS ihembwa nk’Ikigo cy’Ubwishingizi cya mbere gitanga serivisi neza mu gihe Ikigo cy’Igihugu gishinzwe Ingufu (REG) cyabaye icy’icyigenga cyiza.

Ibihembo by’ababaye indashyikirwa muri Siporo y’u Rwanda bitegurwa na Rwanda Sports Awards byatangiye gutangwa muri Kamena 2017.