APR FC yagiye gukomeza kwitegurira shampiyona i Nyagatare
Ikipe ya APR FC ikomeje kwitegura shampiyona y’ikiciro cya mbere iteganyijwe gutangira mu ntangiriro z’ukwezi gutaha, yerekeje i Nyagatare mu Burasirazuba bw’u Rwanda aho igiye gukomereza imyitozo.
Ni nyuma y’icyumweru kirenga iyi kipe y’ingabo z’igihugu yari imaze yitoreza i Shyorongi mu karere ka Rulindo.
Saa mbili zo kuri uyu wa kane tariki ya 13 Nzeri, ni bwo abatoza n’abakinnyi ba APR FC bahagurutse mu mujyi wa Kigali berekeza i Nyagatare aho izakorera imyitozo iminsi itatu, mbere yo kugaruka i Kigali kuri iki cyumweru.
Biteganyijwe ko iyi kipe n’imara kugera i Kigali izahita ikina umukino wa gicuti na AS Muhanga yazamutse mu kiciro cya mbere uyu mwaka, akaba ari umukino uteganyijwe kubera kuri Stade y’i Muhanga ku cyumweru saa sita z’amanywa.
