APR FC iracakirana na Rayon Sports mu mukino uvuze byinshi ku gikombe cya shampiyona
Kuri uyu wa gatanu Tariki ya 15 Kamena, ikipe ya APR FC izakira Rayon Sports mu mukino w’umunsi wa 26 wa shampiyona y’ikiciro cya mbere, AZAM Rwanda Premier league.
Ni umukino aya makipe yombi agiye gucakiranamo mu gihe urugamba rw’ugomba gutwara igikombe cya shampiyona rugikomeje hagati y’aya makipe yombi ndetse n’ikipe ya AS Kigali.
Ikipe ya APR FC igiye gucakirana na Rayon Sports iri ku mwanya wa kabiri muri shampiyona n’amanota 51 inganya na AS Kigali ya mbere, mu gihe Rayon Sports iza ku mwanya wa 3 n’amanota 45, amanota 6 inyuma y’aya makipe ya mbere.
Aya makipe azaba ahurira mu mukino wa 48 muri shampiyona n’umukino wa 86 muri rusange.
Muri rusange ikipe ya APR FC ni yo yatsinze imikino myinshi ya shampiyona muri 47 aya makipe yahuriyemo aho yatsinze 19, Rayon Sports itsindamo 13, banganya imikino 15.
APR FC ni yo iheruka gutsinda umukino uheruka guhuza aya makipe yombi aho igitego cya Muhadjiri Hakizimana ari cyo cyahesheje ikipe y’ingabo z’igihugu kwegukana amanota atatu.
Mu mikino 47 ya Shampiyona aya makipe yakinnye habonetsemo ibitego 129, 68 ku ruhande rwa APR FC na 61 ku ruhande rwa Rayon Sports.
Mu myaka 11 ishize, imikino ibiri; uwo kuwa 11 Kamena 2006, n’uwo mu Ukwakira 2015, ni yo yonyine amakipe yombi yanganyijemo ubusa ku busa .
Imikino 9 muri 28 iheruka ni yo yagiye irangira imwe muri izi ibashije gutsinda indi idakozemo (Gutsindana ku busa).
N’ubwo nta kipe ijya ibasha gutsinda indi mu mukino ubanza n’uwo kwishyura muri shampiyona, muri Shampiyona yo mu 2003/04 APR FC yatsinze umukino ubanza ku bitego 3-1 irongera itsinda uwo kwishyura ku gitego 1-0, mu gihe umwaka wari wabanje Rayon Sports yatsinze umukino ubanza ku gitego 1-0 inabisubira mukeba ku bitego 4-1 mu mukino wo kwishyura.
APR FC yongeye gutsinda Rayon Sports kabiri muri shampiyona ya 2014/15, ubwo yatsindaga igitego 1-0 mu mukino ubanza, ikongera gutsinda Rayon Sports ibitego 4-0 mu mukino wo kwishyura.
Abakinnyi barimo Sina Jerome, Masoudi Djuma na Jimmy Gatete ni bo bayoboye abatsinze ibitego byinshi muri uyu mukino w’ishiraniro uhuza izi ntare ebyiri zo mu rw’imisozi igihumbi.
