Amerika igiye kohereza abasirikare kabuhariwe muri Congo
Perezida wa Leta Zunze Ubumwe za Amerika, Donald Trump yatangaje ko yohereje abasirikare kabuhariwe bacyo muri Gabon, ariko ko bakwinjira muri Repubulika Iharanira Demokarasi ya Congo isaha ku isaha mu gihe cyose umutekano waba utifashe neza.
Perezida Trump avuga ko aba basirikare be bakwinjira muri Congo gutanga ubutabazi mu gihe cyose haba havutse imvururu zakurikira amatora.
Nk’uko BBC ibitangaza, ngo ibaruwa Trump yandikiye abasenateri n’abadepite, yabamenyesheje ko abasirikare ba mbere 80 bageze muri Gabon ku wa Gatanu tariki ya 4 Mutarama 2019.
Ku bwa Donald Trump, avuga ko izi ngabo ze zakoherezwa muri Congo kugira ngo zirinde Abanyamerika bari i Kinshasa, umurwa mukuru wa Repubulika Iharanira Demokarasi ya Congo.
Yagize ati: “Abo basirikare bazaguma muri ako karere kugeza igihe umutekano wo muri RD Congo uzaba umeze neza bitagikenewe ko bagumayo”.
Akomeza avuga ko aba basirikare bashobora kwiyongera mu gihe cyose byaba bikenewe.
Kuri iki cyumweru tariki ya 6 Mutarama 2019, nibwo akanama kigenga gashinzwe amatora muri Congo (CENI) gatangaza ibyavuye mu matora, ariko benshi bakaba bakomeje gukemanga umutekano w’iki gihugu nyuma yo kumenya uzaba yatsinze abandi.
