Amagare: Mugisha Moise na Mugisha Samuel babonye ikipe nshya bazakinira i Burayi

Abakinnyi babiri b’ikipe y’u Rwanda mu mukino wo gusiganwa ku magare, Mugisha Samuel na Mugisha Moise bamaze kubona ikipe nshya bazakinira mu mwaka utaha w’imikino wa 2020, yitwa ‘lmp-La Roche Vendée cycling’ ibarizwa mugi wa Nantes mu Bufaransa.

Mugisha Samuel na Mugisha Moise bari mu ikipe y’Igihugu yitabiriye isiganwa muri Burkina Faso “Tour du Faso 2019”.

Iri siganwa riraba kuva tariki 25 Ukwakira kugeza 03 Ugushyingo 2019.

Samuel yabaye uwa mbere akurikirwa na Moise muri Criterium Byemayire Lambert, isiganwa ryabereye i Huye mu mpera z’icyumweru gishize.

Mugisha Samuel wegukanye Tour du Rwanda 2018 yari amaze imyaka itatu akinira ikipe ya kabiri ya Dimension Data for Qhubeka yo muri Afurika y’Epfo.

Yayigezemo avuye muri Benediction Cycling Club yo mu Karere ka Rubavu mu mwaka wa 2017.

Mugisha Moise w’imyaka 22 y’amavuko we yari asanzwe ari umukinnyi w’ikipe ya Skol Fly Cycling Club ari na yo yazamukiyemo, yatangiye kwitabira amarushanwa mpuzamahanga mu mwaka ushize wa 2018.

Muri uyu mwaka wa 2019, Mugisha Moise yegukanye intera (Etape) mu irushanwa rya Afurika mu batarengeje imyaka 23 “Tour de l’Espoir 2019” ryabereye muri Cameroun.

Muri shampiyona ya Afurika yabereya muri Ethiopia yegukanye umudari wa Feza ari kumwe na bagenzi be mu gusiganwa n’isaha nk’ikipe “Team Time Trial”.

Mugisha Moise ari kumwe na bagenzi be kandi begukanye umudari w’umuringa mu gusiganwa n’isaha nk’ikipe “Team Time Trial” mu mikino y’Afurika “All African Games 2019” yabereye muri Morocco.

Muri iyi mikino kandi Mugisha yegukanye umudari w’umuringa mu gusiganwa n’isaha ku mukinyi ku giti ke “Individual Time Trial”.

Mugisha Moise na Mugisha Samuel bagiye gukina mu Bufaransa biyongera kuri Areruya Joseph wavuye muri Delko Marseille Province, na Uwizeye Jean Claude wavuye muri Sables Vendée bombi baherutse gusinya amasezerano mu ikipe ya Pedal Pelotine Blue Car yo mu birwa bya Martinique.