Amagambo yuje imbamutima n’icyubahiro Marcelo yakoresheje asezera Christiano Ronaldo

Mu ntangiriro z’iki cyumweru ikipe ya Real Madrid yatangaje y’uko Christiano Ronaldo wari uyimazemo imyaka 9 agomba kuyivamo akerekeza muri Juventus de Turin, ubutumwa bwababaje benshi mu bakunzi nndetse n’abakinnyi ba Real Madrid.

Mu bababajwe n’igenda ry’uyu musore ukomoka muri Portigal harimo umunya Brazil Marcelo Jr, abenshi badahwema kuvuga y’uko ari we nshuti y’akadasohoka ya Christiano Ronaldo.

Nta washidikanya ko aba bakinnyi bombi bagiranye ibihe byiza kuva Ronaldo yagera muri Real Madrid mu 2009, dore ko haba mu kibuga no hanze yacyo bagaragarizanyaga ubucuti budasanzwe.

Urukundo Marcelo yakundaga Ronaldo yongeye kurugaragaza ku munsi w’ejo, ubwo yacishaga kuri Instagram ubutumwa buteye agahinda gusa burimo n’icyubahiro asezera kuri mucuti we, bigoranye kugira ngo tuzongere kubona mu mwambaro wa Real Madrid nk’umukinnyi.

Marcelo yagize ati” Ni nde wakabaye yaratekereje ibi Chris? Iki ni cyo gihe cyo kugusezera…nkubwije ukuri, Sinigeze ntekereza y’uko uyu munsi wabaho, gusa nta kintu na kimwe gihoraho iteka mu buzima kandi ndizera y’uko ahandi ugiye uzagirirayo ibyishimo.”

“Twari tumaranye hafi imyaka 10, imyaka 10 y’ibyishimo, ummupira mwiza, dutsinda, dutsindwa, ndetse n’ibihe byiza. Nakwigiyeho byinshi, ubwitange bwawe ni cyo kintu gitangaje nakubonyeho. Ibihe byiza!”

Uretse Marcelo, Sergio Ramos na we wari inshuti y’akadasohoka ya Ronaldo na we yamusezeye abicishije kuri Twitter ye.

Ramos yagize ati” @Christiano, ibiitego byawe, imibare ndetse na buri kimwe twatwaranye birivugira. Wamaze guhabwa umwanya ukomeye mu mateka ya Real Madrid. Nk’aba Madridista(uko ab’i Madrid biyita), tuzahora iteka tukwibuka. Byakabaye byiza gukomezanya nawe, gusa nkwifurije amahirwe n’imigisa!”

Mu gihe cy’imyaka 9 Christiano Ronaldo yari amaze muri Real Madrid, yahakinnye imikino 438 ahatsindira ibitego 451. Yanahatwariye kandi ibikombe byinshi bitandukanye birimo UEFA Champions league 4.