AMAFOTO : Miss Aurore yakoreye ubukwe muri Amerika
Bari muri Leta Zunze Ubumwe za Amerika, Miss Kayibanda Mutesi Aurore yasezeranye mu mategeko n’umukunzi we Egide Mbabazi ibirori byari byagizwe byagizwe ibanga rikomeye mu itangazamakuru, gusa byamenyekanye kubera amafoto yacicikanaga ku mbuga nkoranyambaga.
Kuri iki cyumweru tariki ya 29 Nyakanga nibwo aba bombi bahanye isezerano ryo kubana akaramata nk’umugore n’umugabo imbere y’amategeko mu birori byabereye muri Leta ya Maine i Portland.
Mu mpera z’umwaka wa 2014 nibwo byatangiye kuvugwa ko Mutesi Kayibanda Aurore wabaye Miss Rwanda mu 2012 ari mu rukundo na Mbabazi Egide, gusa aba bombi ntibigeze babihakana cyangwa ngo babihishe kuko buri umwe yashyiraga amafoto yabo ku mbuga nkoranyambaga zitandukanye babwirana amagambo meza y’urukundo.
Basezeranye kubana nyuma y’amezi atanu uyu musore yambitse Miss Mutesi Aurore impeta ishimangira urukundo rwabo mu muhango wabereye muri Pariki ya Grand Canyon iherereye i Las Vegas muri Leta ya Nevada. Miss Bahati Grace nawe witabiriye ibi birori yashyigikiye mugenzi we Mutesi ku munsi yasezeraniyeho na Mbabazi Egide.
