Amafoto-Ikipe y’igihugu ya Espagne yaraye inyagiye iya Croatia ibitego 6-0
Mu ijoro ryakeye, ikipe y’igihugu ya Espagne La Furia Roja yaraye inyagiye iya Croatia ibitego 6-0, mu mukino wa shampiyona y’ibihugu byo ku mugabane w’u Burayi wabereye mu gihugu cya Espagne.
Marco Assensio yagize uruhare rw’ibitego 5 muri 6 igihugu cye cyatsinze Croatia iheruka kwegukana umwanya wa kabiri mu mikino y’igikombe cy’isi.
Ni umukino ikipe ya Croatia yakinnye ifite abasore hafi ya bose dusanze tuzi, kereka umuzamu Daniele Subasic ufite imvune cyo kimwe na Mario Mandzukic wamaze gusezera.
Saul Niguez ni we wafunguriye amazamu Espagne mbere, ku gitego yatsinze ku munota wa 24 w’umukino. Ni ku mupira yari ahawe na Dani Carvajal. Marco Assensio yaje gutsindira iyi kipe y’umutoza Luis Enrique igitego cya 2, ku mupira yatereye hanze y’urubuga rw’amahina. Hari ku munota wa 33 w’umukino.
Mbere y’uko amakipe yombi ajya mu kiruhuko, umuzamu Lovre Kalinic yaje kwitsinda igitego cya 3 ku mupira uremereye Marco Assensio yari amuteye, bajya kuruhka Espagne iri imbere n’ibitego 3-0.
Espagne yarushaga cyane Croatia yatsinze igitego cya kane ku munota wa 49, ku gitego cyatsinzwe na Rodrigo. Ni ku mupira yari ahawe na Marco Assensio.
Kapiteni Sergio Ramos yaje gutsindira Espagne igitego cya 5 ku munota wa 57 w’umukino, ku mupira wa Koruneri Marco Assensio yamuteretse ku mutwe.
Igitego cya gatandatu cya Espagne kinjiye ku munota wa 70 gitsiinzwe na Isco, ku mupira nannone yari ahawe na Marco Assensio wigaragaje cyane muri uyu mukino.
