Amafoto-Bayern Munich yegukanye igikombe cya shampiyona, umutoza asezera burundu
Ikipe ya Bayern Munich yashyikirijwe igikombe cya shampiyona y’Ubudage yamaze kwegukana, umutoza wayo Jupp Heynckes asezera burundu abafana b’iyi kipe.
Mu mukino w’umunsi wa nyuma wa shampiyona y’Abadage iyi kipe yakinnye, yanyagiriwe ku kibuga cyayo Allianz Arena ibitego 4-1, itsindwa na Stuttgart.
Daniel Ginczek ni we wafunguye amazamu ku ruhande rwa Stuttgart ku munota wa 5 w’umukino, mbere y’uko Colentin Torisso yishyura iki gitego ku munota wa 21 w’umukino.
Stuttgart yongeye kubona izamu ku munota wa 42 ibifashijwemo na Anastasios Donis, yongeramo igitego cya gatatu ku munota wa 52 ibifashijwemo n’umunye Congo Chadrack Okolo, mbere y’uko Daniel Ginczek asoza akazi ku munota wa 55 w’umukino.
N’ubwo yatsinzwe uyu mukino, ikipe ya Bayern Munich yahise ishyikirizwa igikombe cya shampiyona yari yaramaze kwegukana, iki gikombe kikaba ari icya gatandatu yatwaye yikurikiranya.
Jupp Heynckes watozaga iyi kipe, yaboneyeho gusezera ku mugaragaro, nyuma y’uko yari yarasezeye mu myaka yashize nyuma iyi kipe ikaza kumwiyambaza ubwo yari imaze kwirukana umutariyani Carlo Anchelotti.
Jupp Heynckes agomba gusimburwa na Niko Kovac wamaze kwemezwa n’ubuyobozi bw’iyi kipe nk’umusimbura wa Heynckes ugeze mu za bukuru.
Bayern yatwaye kino gikombe ifite amanota 84. Igomba kujyana muri UEFA Champions league na Schalke 04, Hofenheim na Borussia Dortmund, mu gihe Hamburg na Cologne zamaze kumanurwa mu kiciro cya kabiri, na ho Wolfsburg ikazakina umukino wa kamarampaka.
