Amadini n’amatorero bafatiye ingamba abantu banze kwikingiza
Nyuma y’uko hari bamwe mu baturage banga kwikingiza bitwaje imyemerere n’ubuhanuzi bakavuga ko urukingo rwa Covid-19 rwaba rukomoka kwa Satani cyangwa abarukoze hari ibindi bintu bibi bagamije kugirira ikiremwamuntu amadini yafashe iyambere mu guhugura abayoboke babo.
Kuri ubu umukirisitu utazikingiza ashobora kutazemererwa kujya mu misa kuri Noheli cyangwa muzindi zisoza umwaka.
Ikindi ni uko kuri za Kiliziya nahandi nta bantu bari bamerewe kugendagenda hanze nk’uko byabaga bimeze mbere y’umwaduko wa Coronavirus.
Hagati aho hari abapadiri bari banze kwikingiza muri Diyosezi ya Gikongoro bagiriwe inama bahindura imyumvire.
Musenyeri wa Diyosezi Gatolika ya Gikongoro, Hakizimana Célestin, yavuze ko bashyize imbaraga mu gukangurira abakirisitu kwikingiza icyorezo cya Covid-19 kugira ngo bagire ubuzima buzira umuze, babashe no gukora umurimo w’Imana mu bwisanzure batuje.
Musenyeri Hakizimana yavuze ko bashyize imbaraga mu gukangurira abakirisitu kwikingiza icyorezo cya Covid 19 kugira ngo bagire ubuzima buzira umuze dore ko Yakomeje avuga ko batanze n’ishuri ryegereye Kiliziya kugira ngo abantu bahakingirirwe ndetse hakaba n’itangazo batanga mu Kiliziya kugira ngo abantu nibava mu misa bajye kwikingiza aho ngaho.”
Hagati aho Minisiteri y’Ubuzima yasabye ko abakirisitu bakirwa bagomba kuza mu materaniro ari abikingije gusa abandi bagashishikarizwa kwikingiza.
Nkuko Minisiteri y’Ubuzima (MINISANTE) yatangaje ku wa Gatandatu tariki 18 Ukuboza 2021 mu Rwanda habonetse abanduye Covid-19 bashya 230, bakaba babonetse mu bipimo 33,530.
Gusa nta muntu wishwe n’icyo cyorezo kuri uwo munsi, abamaze kwitaba Imana bose hamwe mu Rwanda bazize Covid-19 ni 1,344.
Imibare y’abagaragaraho COVID-19 mu Rwanda bigaragara ko ikomeje kuzamuka, dore ko mbere yaho ku wa Gatanu tariki 17 Ukuboza 2021 mu Rwanda habonetse abanduye Covid-19 bashya 153, bakaba barabonetse mu bipimo 19,327.
Ku wa Kane tariki 16 Ukuboza 2021 mu Rwanda hari habonetse abanduye Covid-19 bashya 142 mu bipimo 12,246.
Ni mu gihe ku wa Gatatu tariki 15 Ukuboza 2021 mu Rwanda hari habonetse abanduye Covid-19 bashya 125 mu bipimo 9,816.
