Abigeze kurwara COVID-19 batarakingirwa baburiwe ko bashobora guhura n’ibyago bikomeye

Ikigo gishinzwe kurwanya Indwara muri Amerika (CDC) mu bushakashatsi giherutse gushyira ahagaragara bwagaragaje ko uwigeze kurwara COVID-19 aba afite ibyago byo kongera kuyirwara byikubye gatanu ugereranyije n’uwakingiwe byuzuye.

Iyi nyigo y’iki kigo yakorewe ku bafite imyaka iri hejuru ya 18.

Muri ubu bushakashatsi hifashishijwe abajyanywe mu bitaro barwaye COVID-19 bakaba bari barayirwaye na none mu minsi iri hagati ya 90 na 179.

Abandi bakoreweho ubushakashatsi n’abajyanywe mu bitaro bari barakingijwe inkingo zakozwe hifashishijwe ikoranabuhanga rya mRNA mu minsi hagati ya 90 na 179 ariko batararwaye icyo cyorezo.

Nyuma yiyo nyigo ibyavuye mu nyigo byagaragaje ko kuba umuntu yarwara COVID-19 akayikira no kwikingiza byombi biha umubiri ubudahangarwa ariko uwayikize aba afite ibyago byo kongera kuyandura byikubye inshuro 5,49 ugereranyije no kuba uwakingiwe byuzuye yayandura.

Abahanga mu by’ubuvuzi banzuye bavuga ko “Abantu bose bujuje ibisabwa bagombye kwikingiza COVID-19 vuba bishoboka, haba n’abigeze kuyirwaraho mbere batarakingirwa.”

Icyorezo cya COVID-19 cyagaragaye bwa mbere mu Bushinwa mu Mujyi wa Wuhan mu Ukuboza 2019; kuri ubu 247.352.866 bamaze kuyandura ku Isi yose, abagera kuri 5.013.900 yarabahitanye mu gihe 224.036.183 bamaze kuyikira.

Kugeza ubu, ku Isi hose hamaze gutangwa dose miliyari 7.04 mu gihe abamaze gukingirwa byuzuye bangana na miliyari 3.03, ni ukuvuga 38.9%

Kugeza ubu mu Rwanda hamaze gukingirwa mu buryo bwuzuye abantu 1.990.105 [ubariyemo na 5.870 bafashe dose ya kabiri uyu munsi] kuva ibi bikorwa byatangira ku wa 5 Werurwe 2021.

Abantu 17.961 ni bo bahawe dose ya mbere y’urukingo uyu munsi bituma umubare wabo uba 3.809.747.