Abeddy Biramahire yabaye umukinnyi wa CS Sfaxien byemewe n’amategeko
Rutahizamu w’Umunyarwanda Abeddy Biramahire uherutse kwerekeza muri CS Sfaxien yo mu kiciro cya mbere cya shampiyona ya Tunisia, yamaze kuba umukinnyi wayo ku buryo bwemewe n’amategeko nyuma yo gusinya amasezerano y’imyaka 3.
Iyi kipe yo muri Tunisia yemeje isinyisha ry’uyu musore mu butumwa yacishije ku mbuga nkoranyambaga zayo.
Uyu musore ukomoka i Kanombe mu mujyi wa Kigali yasinye aya masezerano, nyuma yo gutsinda ikizamini cy’ubuzima muri iyi kipe.
Club Sportive Sfaxien yo muri Tunisia uyu musore yerekejemo, ifite agahigo ko kuba ikipe ya mbere muri Africa imaze kwegukana inshuro nyinshi igikombe cya Confederation Cup kurusha andi makipe, kuva cyatangira muri 2004, aho bamaze kugitwara inshuro 4. Inshuro ya nyuma akaba ari mu myaka 3 ishize aho batsinze TP Mazembe.
Abeddy yoyongereye kuri Nshuti Innocent, undi mukinnyi ukomoka mu Rwanda ukina muri shampiyona ya Tunisia, uyu akaba akinira Club Tunisien yo mu kiciro cya mbere.
