Abari gukira Coronavirus mu Rwanda bari kwiyongera
Umubare w’abanduye icyorezo cya COVID-19 giterwa na Coronavirus mu Rwanda wagumye ku 105, mu gihe abandi bantu batatu basezerewe mu bitaro, bituma umubare w’abamaze gukira ugera kuri barindwi.
Ku wa 5 Mata 2020 nibwo abantu bane ba mbere barimo Abanyarwanda batatu n’Umurundi umwe basezerewe aho bari barwariye mu Kigo Nderabuzima cya Kanyinya, nyuma yo gusuzumwa ibipimo bikerekana ko nta bwandu bagifite.
Abasezerewe mu bitaro ku Cyumweru basohotse bagaragara ko bameze neza ku maso, bipfutse udupfukamunwa nka bumwe mu buryo bwo kwirinda.
Mbere yo gusezererwa, buri wese yahabwaga icyangombwa kigaragaza ko yakorewe ibizamini bikagaragaza ko nta Coronavirus agifite mu mubiri.
Itangazo rya Minisiteri y’Ubuzima ryo kuri uyu wa 7 Mata 2020, ryerekana ko mu bipimo 806 byafashwe nta murwayi mushya wa Coronavirus wagaragaye.
Rigira riti ‘‘Byatumye umubare w’abarwaye Coronavirus mu Rwanda uguma ku 105 [muri bo barindwi barakize].’’
Minisante ivuga ko “Abarwayi bose bavurirwa ahantu habugenewe kandi bari koroherwa. Abenshi muri bo ubu nta bimenyetso bya Coronavirus bagaragaza. Nta n’umwe urembye.’’
U Rwanda rwafashe ingamba zirimo guhagarika ibikorwa bitandukanye no kuguma mu rugo mu kwirinda ikwirakwira rya Coronavirus, yarubonetsemo bwa mbere ku wa 14 Werurwe 2020 ku Muhinde wageze mu gihugu ku wa 8 Werurwe 2020 avuye mu Mujyi wa Mumbai.
Guverinoma ku wa 1 Mata 2020 yafashe icyemezo cyo kongera iminsi 15 ku ngamba zafashwe zo guhangana na Coronavirus zirimo gufunga imipaka no kuguma mu rugo, ingendo zigakorwa gusa n’abajya gushaka cyangwa gutanga serivisi zihutirwa nko guhaha no kwivuza.
Icyorezo cya Coronavirus kimaze gukangaranya imfuruka zose z’Isi cyabonetse bwa mbere mu Mujyi wa Wuhan mu Bushinwa mu Ukuboza 2019. Kuva icyo gihe abantu 1 411 332 bamaze kucyandura, 300 759 baragikize mu gihe 81 048 cyabahitanye.
Mu gihe ibihugu bitandukanye birushaho gufata ingamba zitandukanye, zo kwirinda ikwirakwira rya Coronavirus, Abanyarwanda n’abandi barwinjiyemo bashyirwa mu kato mu gihe cy’iminsi 14, guhera igihe bagereye mu gihugu.
Abaturarwanda kandi basabwa gukomeza kubahiriza amabwiriza y’inzego z’ubuzima, hitabwa cyane cyane ku gukaraba intoki kenshi hifashishijwe amazi meza n’isabune cyangwa alukolo yabugenewe, hanubahirizwa intera ya metero imwe hagati y’umuntu n’undi.
Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.
Minisante isaba umuntu ugaragaza ibyo bimenyetso guhamagara ku 114, cyangwa akohereza ubutumwa bwa WhatsApp kuri +250788202080 cyangwa akitabaza umujyanama w’ubuzima umwegereye.
