Abanya Afurika barenga 200 bari barihishe muri Australia batangiye kwaka ubuhungiro
Abanya Afurika barenga 200 barimo abayobozi n’abakinnyi bari bitabiriye imikino ya Commonwealth game muri Australia, batse ubuhungiro muri iki gihugu, nyuma y’uko bamwe baburiwe irengero mu gihe amarushanwa yabaga, abandi ntibanigere bayitabira.
Iyi mikino yaberaga muri Gold Coast yasojwe ku wa 15 Gicurasi, uyu mwaka.
Mu baburiwe irengero harimo 1/3 cy’abari bahagarariye igihugu cya Cameroun, abanya Uganda 6, Abanyarwanda 2 barimo Denise Mutatsimpundu wari uhagarariye u Rwanda muri Volleyball ikinirwa ku mucanga na Jean Paul Nsengiyumva ukina umukino wo guterura ibiremereye, wabuze ubwo bari mu kiruhuko cyo kujya kwihagarika ntiyigere ahindukira.
Nyuma ya gasopo yatanzwe na Minisitiri wa Australia ushinzwe imirimo y’imbere mu gihugu ko abahagumye bazafungirwa passports, abakinnyi n’abatoza bari babuze batangiye kuva mu bwihisho, abenshi muri bo bakaba banatangiye gusaba ibyangombwa by’ubuhunzi kugira ngo bemererwe kuguma muri ikigihugu.
Leta ya Australia ikomeje gushakisha abandi 50 bari bafite Visa zigomba kurangiza mandat ku wa 15 Gicurasi bakiri muri iki gihugu.
Amakuru avuga ko bamwe bahise kuguma muri iki gihugu mu rwego rwo kwirinda itotezwa ry’amadini riri mu bihugu byabo, mu gihe abandi bavuga ko ibitsina byabo bituma bibasirwa n’abatinganyi.
Mu gihe bamwe bitwaza amakenga yo kutizera umutekano mu bihugu byabo, bimenyerewe ko imikino yakiriwe n’ibihugu bikize iba nk’igikoresho cyo gushaka ubuzima bwiza, bijyanye n’uko abayitabira baba bahawe Visa zizewe.
Si ubwa mbere igihugu cya Australia gihuye n’ikibazo nk’iki, kuko mu mikino Olympique yabereye i Sydiney muri 2000 ndetse n’imikino ya Commonwealth game yo muri 2006 na bwo abanya Afurika 21 baburiwe irengero, nyuma baza kwaka ubuhungiro nyuma y’imikino Olympiques yabereye i Londres mu 2012.
