Abantu 905 bakize icyorezo cya Coronavirus naho 11 bitaba Imana

Icyorezo cya Coronavirus gikomeje gukaza umurego mu gihugu cyacu ndetse n’isi yose muri rusange, aho umubare w’abandura ndetse n’abahitanwa niki cyorezo ugenda wiyngera kurushaho kurusha uko byari bimeze iki cyorezo kikigera mu gihugu cyacu mu kwezi kwa gatatu umwaka ushize 2020.

Bitewe n’ubwiyongere bwinshi bw’icyorezo cya Coronavirus mu duce tumwe na tumwe tw’igihugu cyacu, Guverinoma yafashe ingamba zo gushyira muri gahunda ya Guma mu rugo umujyi wa Kigali ndetse n’uturere umunani twakomezaga kugaragaramo ubwiyongere bwinshi bw’abandura iki cyorezo ndetse n’abahitanwa nacyo.

Ku munsi wejo hashize tariki ya 20 Nyakanga 2021, Minisiteri y’Ubuzima yatangaje ko abantu bagera kuri 906 basanzwe baranduye icyorezo cya coronavirus mu bipimo bingana na 10.863, aho umujyi wa Kigali wabonetsemo abarwayi 182, Musanze ibonekamo abarwayi 84, Kamonyi abarwayi 78 mu gihe mu karere ka Burera habonetse abarwayi 71.

Ikindi Minisiteri y’ubuzima yatangaje nuko icyorezo cya Coronavirus cyahitanye abantu 11 ejo tariki ya 20 Nyakanga 2021, naho abantu bagera kuri 905 aribo byatangajwe ko bakize iki cyorezo.

Kugeza ubu abarwayi bashya babonetse batumye umubare w’abamaze kwandura mu Rwanda uba 59.141 mu bipimo 1.906.789 bimaze gufatwa kuva muri Werurwe 2020.

Abarwayi bakize biyongereyeho 905, abamaze gukira bagera ku 41.951 mu gihe abakirwaye ari 16.513, barimo 69 barembye.

Ibikorwa byo gukingira Coronavirus mu Rwanda byatangiye ku wa 5 Werurwe 2021, ndetse kugeza ubu hakingiwe 406.004 bahawe inkingo zirimo iza AstraZeneca na Pfizer-BioNTech.

Yanditswe na Hirwa Junior