Abantu 37 biyongeye ku bamaze kwandura COVID-19 mu Rwanda mu gihe babiri yabahitanye
Raporo ngarukamunsi ya Minisiteri y’Ubuzima yagaragaje ko abantu 37 banduye COVID-19 mu bipimo 8.942 byafashwe mu gihe babiri ari bo bahitanywe n’iki cyorezo, bituma umubare w’abo kimaze kwica uba 1.318.
Itangazo rya Minisiteri y’Ubuzima ryo kuri uyu wa 22 Ukwakira 2021, rigaragaza ko abishwe na COVID-19 ari umugore w’imyaka 58 w’i Rusizi n’umugabo w’imyaka 67 wo mu Karere ka Gisagara.
Kuri uyu wa Gatanu, tariki ya 22 Ukwakira 2021 kandi abantu 37 ni bo banduye, umubare uri ku ijanisha rya 0.4%. Kuri uyu munsi abarwayi babiri bashya binjijwe mu bitaro ariko nta wasezerewe nyuma yo gukira. Abarwayi bane ni bo barembye.
Kuva ibikorwa byo gutanga inkingo za COVID-19 byatangira ku wa 5 Werurwe 2021, abaturarwanda 1.756.644 bamaze gukingirwa mu buryo bwuzuye [ubariyemo 6.560 bahawe dose ya kabiri uyu munsi] mu gihe 3.596.841 bamaze guhabwa dose imwe barimo 67.624 bahawe dose ya mbere uyu munsi.
