Abantu 300,000 bashobora guhitanwa na coronavirus muri Afurika
Muri Afrika abantu bagera ku 300000 bashobora guhitanwa n’icyorezo cya covid-19 muri uyu mwaka wonyine.
Ibi bigaragazwa na raporo nshya ya komisiyo y’ishyirahamwe mpuzamahanga ishinzwe iby’ubungu muri Afrika yasohotse kuri uyu wa gatanu ihereye kubyavuye mu bushakashatsi bwa kaminuza “Imperial College London”yo mu Bwongereza.
Iyo raporo ivuga ko nihatagira igikorwa kigaragara mu kurwanya icyorezo cya Corona virus, abantu bagera kuri miliyoni eshatu n’ibihumbi amagana atatu bashobora guhitanwa n’iki cyorezo.
Iyo raporo ivuga ko abantu nibatubahiriza neza amabwirizwa bahawe n’abayobozi b’ibihugu byabo yo kudahererekanya ibiganza ndetee no kwirinda kwegerana, abantu barenga miliyoni 122 bashobora kwandura icyorezo cya corona virus.
Abahanga berekana ko uko byagenda kose, inzego z’ubuzima zisanzwe zicumbagira muri Afrika, zizahura n’ikibazo cyo kugira umubare munini w’abanduye iki cyorezo cya corona virus.
Iyo raporo ikaba yerekana ko mu gihe ibintu byaba bigenze neza, Afrika izakenera agera kuri miliyari 44 z’Amadolari ya Amerika azakoreshwa mu gushaka ibikoresho byo gupima, gushaka inkingo no kuvura abagaragayeho corona virus.
Raporo ikaba igaragaza ko Afuriya izahura n’ihungabana rikomeye ry’ubukungu kurusha ugereranije n’indi migabane.
