Abanduye coronavirus mu Rwanda biyongereyeho umuntu umwe
Minisiteri y’ubuzima mu Rwanda kuri uyu wa wa Gatatu tariki ya 25 Werurwe 2020, yatangaje ko habonetse undi muntu umwe wasanganywe COVID-19.
Itangazo ryashyizwe ahagaragara na Minisiteri y’ubuzima rivuga ko habonetse undi murwayi umwe wa coronavirus wiyongereye kuri 40 bari bamaze kuboneka bituma umubare wiyongera baba 41.
MINISANTE yavuze ko uyu wasanganywe COVID-19 uyu munsi, yageze mu Rwanda avuye i Dubai.
Abanyarwanda bose barasabwa gukomeza kwitwararika bakurikiza ingamba zafashwe na Leta mu rwego rwo kwirinda iki cyorezo.
Abanyarwanda barasabwa gukaraba intoki bakoresheje amazi meza n’isabune, kwirinda kujya ahantu hateraniye abantu benshi, kwirinda guhana ibiganza mu gihe basuhuzanya, kwirinda gukora ingendo zidakenewe cyane no kuva mu ngo zabo nta mpamvu zifatika.
Leta y’u Rwanda isaba Abanyarwanda guhamagara 114 mu gihe wumvishe ufite ibimenyetso bya Koronavirus birimo umuriro, inkorora, guhumeka bigoranye.
