Abakinnyi batanu b’ikipe y’igihugu ya Eritrea batorokeye muri Uganda

Kuva ejo ku wa kabiri, abakinnyi batanu b’ikipe y’igihugu ya Eritrea ntabwo barongera kuboneka nyuma yo kuva muri Hoteli bari bacumbitsemo iherereye mu gihugu cya Uganda.

Bamwe mu bakurikirana iyi kipe babwiye BBC dukesha iyi nkuru ko aba bakinnyi bacitse ndetse ubu bakaba bari gusaba ubuhungiro muri Uganda.

Ikipe ya Eritrea yagiye muri Uganda mu mikino ya CECAFA y’abatarengeje imyaka 20 ubu igeze mu mikino ya nyuma.

Aya makuru kandi yemejwe na Habimana Aimable, uri mu bashinzwe iri rushanwa.

Avuga ko baburiye muri Speke Apartments aho bari bacumbitse.

Bwana Habimana yabwiye ikinyamakuru Monitor ati: “Ubu twashyize abashinzwe umutekano aho bacumbitse no hafi y’iki kipe kugirango irushanwa rizarangire neza”.

Iyi kipe ya Eritrea yari yitwaye neza kuko ubu igeze muri kimwe cya kabiri cy’irangiza (demi-finale) aho ikina na Kenya uyu munsi kuwa gatatu.

Ntabwo ingaruka zo kubura kw’aba bakinnyi zizwi neza ku musaruro w’iyi kipe uyu munsi.

Umutoza ubu asigaranye abakinnyi 14, gusa yavuze ko abatorotse bari banarwaye.

Mu 2015 abakinnyi 10 b’ikipe y’igihugu nkuru ya Eritrea banze gusubira mu gihugu cyabo nyuma yo gukina umukino muri Botswana.

Mu 2013 abakinnyi icyenda (9) ba Eritrea n’umutoza wabo batorokeye muri Kenya

Imiryango iharanira uburenganzira bwa muntu ivuga ko urubyiruko ibihumbi amagana rwa Eritrea rwahunze kubera ibikorwa bibi rukorerwa birimo n’imirimo ya gisirikare y’itegeko.