Abahanzi bose bazaririmba mu gitaramo cya East African Party 2020 bamenyekanye
Ubuyobozi bwa bwa kompanyi ya East African Promoters itegura igitaramo ngarukamwaka cya East African Party kizaba tariki ya 1 Mutarama 2020 bwamaze gutangaza ko umuhanzi Bruce Melodie ari we wuzuza umubare w’abahanzi 7 bazaririmba muri iki gitaramo.
Ni igitaramo kigiye kuba ku nshuro ya 12 aho kuri iyi nshuro hazaba gutungurana kuko abahanzi bazakiririmbamo bose ari Abanyarwanda mu gihe ubusanzwe hajyaga hatumirwamo umuhanzi w’umunyamahanga.
Ubuyobozi bwa EAP butangaza ko gukoresha Abanyarwanda 100% ari mu rwego rwo kwerekana ko umuziki w’u Rwanda hari intambwe igaragara umaze gutera ndetse n’abahanzi b’Abanyarwanda bagahabwa agaciro bagomba.
Abahanzi 7 bazaririmba muri iki gitaramo batangajwe ni The Ben, King James, Riderman, Andy Bumuntu, Butera Knowless, Bushali na Bruce Melodie ari nawe wuzuza uru rutonde.
Igitaramo cya East African Party 2020 kizabera muri Kigali Arena yakira abantu bagera ku bihumbi 15, ikaba ariyo nyubako ya mbere mu zakira ibikorwa by’imyidagaduro mu Rwanda.
Kwinjira muri iki gitaramo ni amafaranga 20000 mu myanya y’icyubahiro (VVIP), 15000frw mu myanya y’icyubahiro y’icyiciro gikurikira (VIP) n’amafaranga ibihumbi 5000frw mu myanya isanzwe. Ni mugihe abazagura amatike bwa mbere bo bagabanyirijwe ibiciro kuko bo bazishyura 15000frw (VVIP), 10000frw (VIP) n’amafaranga 3000frw ahasanzwe. Imiryango izaba ifunguye guhera saa kumi z’umugoroba.
