2023 Umwaka w’ amasabukuru n’ isaranganya mu bakeba
Umwaka w’2023 ni umwaka amakipe akomeye mu Rwanda arimo kwizihizamo amasabukuru y’ igihe yavukiye ndetse unababere umwaka w’ intsinzi kuko yose yatwaye ibikombe muri uyu mwaka w’ imikino 2022-2023.
Mu mwaka 2023 Rayon Sport FC iyobowe na Rtd Jean Fidele iri kwizihiza isabukuru y’ imyaka 55 imaze ishinzwe kuko yashinzwe muri Gicurasi 1968. Mu kwizihiza iyo sabukuru iyo kipe yahaye impano abafana bayo maze itwara igikombe cy’ Amahoro itsinze mukeba wayo w’ ibihe byose APR FC ku gitego 1-0 ku busa cyatsinzwe na Eric Ngendahimana mu mukino wabereye kuri stade ya Huye bityo ihita ibona bidasubirwaho itike yo kuzasohokera u Rwanda mu Mikino ya konfederasiyo.
Nubwo yatsindiwe ku Mukino wa Nyuma w’ igikombe cy’ Amahoro kandi ariyo ifite ibikombe by’Amahoro byinshi kuko ifite 14 , ikipe y’ Ingabo z’ Igihugu APR FC nayo iri kwizihiza imyaka 30 ishize ivutse kuko yavutse tariki ya 1 Kamena 1993 ariko yatwaye igikombe cya Shampiyona cy’ umwaka w’ Imikino 2023-2023 bityo ikaba izanasohokera u Rwanda mu Mikino Nyafurika y’ Amakipe yabaye aya mbere iwayo(CAF Champions League).
