Rutahizamu wa Liverpool Sadio Mane yagaragaje ko ari mu rukundo n’indirimbo Slowly ya Meddy

Rutahizamu w’ikipe ya Liverpool yo mu gihugu cy’Ubwongeleza Sadio Mane ukomoka mu gihugu cya Senegal, ukomeje kugaragaza ko ari umukinnyi w’umuhanga ku rwego mpuzamahanga yagaragaye ari kumva indirimbo ’Slowly’ ya Meddy.

Abinyujije kuri Instagram ye, Sadio Mane wagaragazaga ko ari muri Singapore yashyizeho agace gato k’iyi ndirimbo agaragaza ko ari kuyumva ashyiraho ijambo rigira riti “On fire” ugenekereje yashakaga gusobanura uburyo yaryohewe n’iyi ndirimbo.

Sadio Mane yagaragaje ko akunda Slowly ya Meddy

Muri iyi minsi shampiyona zabaye zihagaze mu gihe abakinnyi berekeje mu makipe y’ibihugu, Sadio Mane yaboneyeho akanya ko kujya gufata ibiruhuko ari gukorera muri Singapore.

Meddy wakoze indirimbo slowly ku mbuga nkoranyambaga yagaragaje ko yabonye ko Sadio Mane yumvise indirimbo ye ashyiraho ifoto y’umufana wari wabibonye mbere Rutamu Jr wamwerekaga ibyabaye.

Nubwo yerekanye ko yabibonye, Meddy ntiyigeze agira ijambo arenzaho.

Indirimbo Slowly ya Meddy yarakunzwe cyane ndetse kugeza ubu iri mu ndirimbo ze zakurikiwe cyane ku rukuta rwe rwa You tube. Imaze kurebwa n’abasaga miliyoni 17.

Uyu muhanzi ahamya ko yamufunguriye inzira zo gutangira kumvikana mu bakunzi ba muzika bo hanze y’u Rwanda.

Meddy kugeza ubu ari kubarizwa mu Rwanda aho ategerejwe mu gitaramo cya Youth Konnect kigomba kuba kuri uyu wa Gatatu tariki 9 Ukwakira 2019 aho ahurira ku rubyiniro na Patoranking, Bruce Melodie na Charly na Nina.

Rutahizamu wa Liverpool Sadio Mane
Umuhanzi w’Umunyarwanda Ngabo Medard “Meddy”

Indirimbo Slowly ya Meddy

Comments

comments