Real Madrid yegukanye igikombe cy’isi ku ncuro ya gatatu yikurikiranya

Ikipe ya Real Madrid yo mu gihugu cya Espagne, yegukanye igikombe cy’isi cy’ama Clubs ku ncuro ya gatatu yikurikiranya nyuma yo kunyagira Al Ain yo muri leta zunze ubumwe z’Abarabu.

Ni mu irushanwa mpuzamigabane rihuza amakipe yatwaye ibikombe ku migabane yabyo ryaberaga i Abu Dhabi.

Umukino wa nyuma w’iri rushanwa warangiye  Real Madrid itsinze ibitego 4-1.

Real Madrid yabonye itike y’umukino wa nyuma isezereye muri ½  Kashima yo mu Buyapani ku bitego 3-1, mu gihe Al Ain yo yari yasezereye River Plate yo muri Argentina kuri za Penaliti.

Iyi kipe y’umutoza Santiago Solari yafunguye amazamu ku munota wa 14 ibifashijwemo na Luka Modric, Marcos Llorente ayitsindira igitego cya kabiri ku munota wa 60, Sergio Ramos atsinda icya gatatu ku wa 78 mbere y’uko umwana witwa Shiotani ayitsindira icya kane ku munota wa 86 w’umukino.

Ikipe ya Al Ain yabonye impozamarira mu minota y’inyongera ibifashijwemo kuri penaliti na Yahia Nader.

Gutsinda uyu mukino byafashije iyi kipe y’i Madrid kwegukana iki gikombe ku ncuro ya gatatu yikurikiranya(2016, 2017, 2018) kikaba kandi ari igikombe cy’isi cya kane cy’ama Clubs yegukanye muri rusange.

Ikipe ya River Plate yo muri Argentina yo yegukanye umwanya wa gatatu muri iri rushanwa itsinze Kashima ibitego 4-0.