Real Madrid ikuyeho 3 mu manota 14 yarushwaga na mukeba
Nyuma yo kwihererana Deportivo Alaves ikayitsinda ibitego 4-0, ikipe ya Real Madrid isigaye irushwa amanota 11 na FC Barcelona muri shampiyona, gusa Barcelona ifite umukino igomba gukina na Girona uyu munsi guhera 21:45.
BBC ya Real Madrid ni yo ifashije iyi kipe y’ubwami bw’I Madrid gushyira igitutu kuri mukeba ngo irebe ko yatwara igikombe cya shampiyona n’ubwo ntaw’ushidikanya ko bigoranye, dore ko iyi Barcelona itaratakaza n’umukino n’umwe muri 24 imaze gukina muri iyi shampiyona.
Ibifashijwemo na Christiano Ronaldo ku munota wa 44 n’uwa 61 w’umukino, Gareth Bale ku wa 46 na Kharim Benzema ku munota wa 89, Real Madrid ibashije gutsinda Alaves ibitego 4-0.
Ibi bitego bisize bigabanyije umubare w’ikinyuranyo cyari hagati ya Real Madrid na FC Barcelona kuko ubu cyageze ku manota 11, mu gihe iyi kipe y’I Catalunya itarakina umukino igomba kwakiramo Girona banasangiye umugi, umukino ugomba kubera kuri Stade ya Camp Nou muri iri joro.
Mu gihe Barcelona yaba itsinze uyu umukino, ikinyuranyo cy’amanota ari hagati ya Real Madrid na Fc Barcelona cyasigara ari amanota 14 mu gihe shampiyona ya Espagne, La Liga ibura imikino 15 ngo igere ku musozo.
Uyu mukino kandi usize rutahizamu Christiano Ronaldo ahagaze ku mwanya wa kane mu bamaze gutsinda ibitego byinshi aho amaze kureba mu izamu incuro 14, akaba arushwa ibitego 6 na Lionel Messi ufite ibitego 20.
Real Madrid yo ihagaze ku mwanya wa gatatu ku rutonde rwa shampiyona n’amanota 51, amanota ane inyuma ya Atletico Madrid basangiye umugi n’ubwo iyi Atletico ifite umukino w’ikirarane.
