Premier league: Chelsea yakorewe ibya mfura mbi na Manchester United (Amafoto)

Ikipe ya Chelsea yatangiye nabi imikino ya shampiyona y’Abongereza ya 2019/2020 nabi, inyagirwa na Manchester United ibitego 4-0 mu mukino w’umunsi wa mbere wa shampiyona wakinwe kuri iki cyumweru.

Iyi kipe y’umutoza Frank Lampard yari yasuye Manchester United ku kibuga cyayo cya Old Trafford.

Ibitego bibiri bya Marcus Rashford, icya Anthony Martial n’icya Daniel James ni byo byafashije Manchester United gutangira shampiyona y’Abongereza neza.

Ikipe ya Chelsea igomba gutangira ubuzima bushya nyuma y’igenda rya Eden Hazard na David Luiz, yakinnye uyu mukino idafite Willian Borges da Silva ufite akabazo k’imvune, mu gihe N’golo Kante yari yabanjwe hanze n’umutoza Frank Lampard.

Manchester United yo yari yagiriye ikizere bamwe mu bakinnyi bashya yasinyishije muri iyi mpeshyi, barimo myugariro Harry Maguire na Aaron Wan-Bisaka.

Umukino watangiye amakipe yombi akina neza, gusa Manchester United isoza igice cya mbere ari yo iri imbere n’igitego kimwe ku busa. Ni igitego cyatsinzwe na Rashford kuri penaliti, nyuma y’ikosa yari amaze gukorerwaho na Kurt Zouma.

Chelsea yabonye uburyo bubiri bukomeye bwashoboraga kuyibyarira ibitego, harimo umupira Tamy Abraham yarekuye mu minota ya mbere y’umukino ukagarurwa n’igiti cy’izamu, ndetse n’ishoti rikomeye rya Emmerson ryagonze umutambviko.

Ikipe ya Manchester United yatsinze igitego cya kabiri ku munota wa 65 ibifashijwemo na Martial wari uhawe umupira na Scot MC Tominay, mbere y’umunota umwe ngo y’uko Rashford atsinda icya kane ku mupira yari ahawe na Paul Pogba.

Daniel James winjiye mu kibuga asimbura yatsindiye Manchester United igitego cya kane, umukino urangira Chelsea nta n’impozamarira ibonye.

Ni mu gihe Arsenal yo yatsinze New Castle United igitego kimwe ku busa cyatsinzwe na Aubameyang.