Neymar na FC Barcelona bateye intambwe yo gukemura ikibazo bafitanye batagiye mu nkiko
Umunya-Brazil Neymar Jr na FC Barcelona yahoze akinira, bateye intambwe yo gukemura ikibazo bafitanye batiriwe bajya kuburanira mu rukiko.
Kuri uyu wa gatanu byari byitezwe ko Neymar aburana na FC Barcelona ku bijyanye n’uduhimbazamusyi iyi kipe imurimo, gusa byarangiye uyu musore kuri ubu ukinira PSG atageze ku rukiko.
Amafaranga y’uduhimbazamusyi FC Barcelona ibereyemo Neymar ni miliyoni 26 z’ama-Euro yamwemereye kuzamuha muri 2016, ubwo uyu musore yongeraga aya masezerano yari kurangira muri 2022.
Neymar akiva muri FC Barcelona muri 2017 akerekeza muri PSG, FC Barcelona yanze kumwishyura ariya mafaranga.
Byabaye ngombwa ko Neymar n’abamuhagarariye biyambaza ubutabera, kugira ngo yishyurwe ariya mafaranga.
FC Barcelona ku rundi ruhande na yo yishyuza Neymar angana na miliyoni umunani n’igice z’ama-Euro zo kuriha ibyangiritse, dore ko yayivuyemo akerekeza muri PSG nta n’umwaka urashira yongereye amasezerano.
Impande zombi zagombaga kuburanira muri Espagne kuri uyu wa gatanu, gusa Neymar yanze kwitaba urukiko n’ubwo yaraye mu mujyi wa Barcelona, nk’uko byatangajwe n’itangazamakuru ryo muri Espagne. Ikiriho ni uko impande zombi zagiranye ibiganiro, zikemeranya gukemura ikibazo mu mahoro.
Amakuru avuga ko Neymar yafashe indege agasubira mu Bufaransa mu gitondo cyo kuri uyu wa gatanu.
Uyu musore yakiniye FC Barcelona imyaka ine, ayitsindira ibitego 105 mu marushanwa atandukanye yayikiniye. Iyi kipe kandi yatwaranye na yo ibikombe bitandukanye, birimo bibiri bya shampiyona, bitau by’umwami ndetse na UEFA Champions league imwe.
