Mo Salah yaciye agahigo gakomeye Didier Drogba yari yihariye muri Shampiyona y’Abongereza
Rutahizamu w’umunya-Misiri Mohamed Salah, yaciye agahigo k’Umunyafurika watsinze ibitego byinshi muri shampiyona y’Abongereza kari gafitwe n’umunya-Côte d’Ivoire Didier Drogba.
Igitego Salah yatsinze Wattford Liverpool iyinyagira ibitego 5-0 ku munsi w’ejo, cyari gihagije ngo uyu munya-Misiri yuzuze ibitego 104 amaze gutsindira iriya kipe y’umutoza Jürgen Klopp.
Salah yatsinze igitego cya kane ku munota wa 54 w’umukino, nyuma yo gucengagura ba myugariro ba Wattford.
Ni igitego cyaje gikurikira icya Sadio Mané cyo ku munota wa cyenda w’umukino, ndetse na bibiri by’umunya-Brésil Roberto Firmino waje no gutsinda agashinguracumu ku munota wa 90+1 w’umukino.
Salah umaze gutsinda ibitego birindwi muri iyi shampiyona, kuri ubu aranganya ibitego 104 na Drogba wabitsinze mu myaka umunani yakinnye muri shampiyona y’Abongereza akinira Chelsea.
Aba bagabo bombi baragubwa mu ntege n’umunya-Sénégal Sadio Mané watsinze ibitego 100 muri shampiyona y’Abongereza akinira Southampton na Liverpool bimugira uwa gatatu wayitsinzemo byinshi mu mateka.
