Messi uheruka guhembwa nk’umukinnyi wa mbere ku isi yongeye kuvunika
Lionel Messi uheruka guhembwa nk’umukinnyi wahize abandi ku isi, yaraye avunikiye mu mukino wa shampiyona ya Espagne FC Barcelona yatsinzemo Villarreal bigoranye.
Uyu ni wo mukino Messi yari ashoboye gukina yabanje mu kibuga kuva umwaka w’imikino watangira, nyuma y’imvune yari yaragiriye mu myitozo ya FC Barcelona ubwo shampiyona yari yegereje.
Messi yakinnye iminota 45 y’igice cya mbere, mbere yo gusimburwa na Ousmane Dembele igice cya kabiri kigitangira. Igihe uyu musore agomba kumara hanze y’ikibuga ntabwo kiramenyekena, gusa ashobora kudakina umukino w’umunsi wa karindwi wa shampiyona FC Barcelona igomba guhuriramo na Getafe.
Messi wakinaga umukino wa 400 muri shampiyona ya Espagne, yatanze umupira wavuyemo igitego kimwe muri 2-1 FC Barcelona yatsinze Villarreal. Ni kuri koruneri yateye ku munota wa gatandatu w’umukino, bikarangira Antoine Griezmann atsinze igitego n’umutwe.
Ku munota wa 15 w’umukino Arthur Melo yatsindiye FC Barcelona igitego cya kabiri, ku ishoti riremereye yatereye hanze y’urubuga rw’amahina bikarangira umupira uruhukiye mu rucundura.
Igitego rukumbi cya Villarreal cyabonetse ku munota wa 44 w’umukino gitsinzwe na Kapiteni Santi Cazorla. Ni ku ishoti rikomeye yarekuriye hanze y’urubuga rw’amahina umupira winjira mu rucundura.
