Manchester United yatakaje burundu ikizere cyo gukina UEFA Champions league
Ikipe ya Manchester United yatakaje burundu ikizere cyo gukina imikino ya UEFA Champions league y’umwaka utaha, nyuma yo kunganya igitego 1-1 na Huddersfield Town mu mukino w’umunsi wa 37 wa shampiyona y’Abongereza.
Ni umukino ikipe ya Manchester United yasabwaga gutsinda ku kabi n’akeza, kugira ngo ikomeze kotsa igitutu amakipe ya Chelsea na Arsenal yari ayiri imbere.
Iyi kipe y’umutoza Ole Gunnar Solkjaer yafunguye amazamu ku munota wa munani ibifashijwemo na Scot McTomminay, gusa birangira ku munota wa 60 yishyuwe na Huddersfield. Iyi kipe yishyuriwe n’Umubiligi Isaac Mbenza, ku mupira yari ahawe na Jonas Lössl.
Abasore ba Manchester United barwanye no gushaka igitego cya kabiri, gusa iminota 90 y’umukino irangira bagabanye amanota na Huddersfield.
Kunganya uyu mukino byahise bishimangira ko n’aho Manchester yatsinda umukino w’umunsi wa nyuma wa shampiyona izasuramo Southampton, itarangiza mu makipe ane ya mbere.
Ikipe isa n’aho yishyize mu mwanya mwiza wo kuba yagaragara mu makipe ane ya mbere ni Chelsea yatsinze Watford ibitego 3-0, inahita yambura Tottenham umwanya wa gatatu. Iyi kipe irasabwa byibura kunganya na Leicester City mu mukino w’umunsi wa nyuma wa shampiyona. Chelsea kandi iracyafite Europa league nk’indi nzira yayigeza muri UEFA Champions league, mu gihe yaba itwaye iri rushanwa ryo ku mugabane w’u Burayi.
Mu gihe Arsenal yaba itsikiye imbere kuri Brigthon & Hove Albion bari gukina, Chelsea yahita yizera kuzaza mu makipe ane ya mbere ititaye ku bya Europa league.
Arsenal yaba isigaranye amahirwe yo muri Europa league, mu gihe na yo yaba ishoboye kwegukana igikombe cy’iri rushanwa. Mu gihe kandi iyi kipe yaba itsinze Brigthon, yasigara icungana na Tottenham mu mukino w’umunsi wa nyuma wa shampiyona.
