Lionel Messi aracyatekereza ku gusezererwa na Liverpool FC
Lionel Messi yavuze ko ashaka gufasha ikipe ya FC Barcelone gutsindira igikombe cy’umwami cya Copa del Rey mu rwego rwo kugabanya akababaro ko gutsindwa na Livepool mu irushanwa rya Champions League ry’uyu mwaka.
Messi ubwo yagiranaga ikiganiro n’abanyamakuru yavuze ko na n’ubu agitekereza ku gutsindwa na Liverpool muri kimwe cya kabiri cya Champions League ku itariki ya 7 y’uku kwezi kwa gatanu, avuga ko ibi biri mu bihe bibi cyane yagize mu mwuga we.
Icyo gihe Liverpool yatsinze Barcelone ibitego 4-0 mu mukino wo kwishyura wabereye ku kibuga Anfield cya Liverpool – mu gihe Barcelone yari yatsinze Liverpool ibitego 3-0 mu mukino ubanza, ihita iyisezerera.
“Gutsindira Copa del Rey bwaba ari bwo buryo bwiza cyane bushoboka bwo gusoza uyu mwaka w’imikino”
“Tugomba gusaba imbabazi z’ukuntu twakinnye mu gice cya kabiri kwa Liverpool, atari ukubera uko umukino warangiye, ahubwo kubera uko byagaragaye ko tutahatanye. Cyabaye kimwe mu bihe bibi cyane nagize mu mwuga wanjye”.
“Nagize ibibazo mu ikipe y’igihugu [ya Argentine] kandi ndacyashaka kugerageza kugira icyo nyitsindira. Gusezererwa muri Champions League ntabwo bituma ndekeraho gushaka kuba hano [muri Barcelone]”
FC Barcelone yamaze gutsindira igikombe cya shampiyona y’uyu mwaka, yashobora gutwara ibikombe bibiri iramutse itsinze Valencia ku mukino wa nyuma wa Copa del Rey kuri uyu wa gatandatu.
Lionel Messi yatsinze ibitego 36 afasha FC Barcelone kwegukana igikombe cya shampiyona ya Espanye – izwi nka La Liga y’uyu mwaka
